Era EMD (Entitat Municipau Descentralizada) d’Arròs e Vila, recuperèc eth darrèr ostiu en tot coïncidir damb era hèsta major, era anciana escòla municipau entà convertir-la en un petit musèu. Es trabalhs consistiren ena recuperacion deth mobiliari e objèctes dera escòla, sustot des ans 50 e 60 deth sègle darrèr, encara que tanben s’a pogut recuperar quauqua pèça deth decènni des ans 40.

Ara eth següent pas, segontes Juan José Grijalba, President dera EMD d’Arròs e Vila, a estat demanar oficiauments ath Conselh Generau d’Aran, qu’era anciana escòla sigue includida laguens dera Rota des Musèus dera Val d’Aran, entà arténher atau un nau reclam toristic e culturau entara Entitat Municipau.

Cau arrebrembar qu’en Arròs se tròbe tanben era Casa deth Senhor d’Arròs, edifici bastit en 1820 e qu’actuauments ei era sedença protocolària deth Conselh Generau d’Aran ath delà de albergar er Archiu Istoric dera Val d’Aran a on se sauve era Carta Magna deth pòble aranés: Era Querimònia.