Arties e Garòs artenhen era certificacion coma Pòbles mès Polits d’Espanha

Era associacion de “Los Pueblos más Bonitos de España” comuniquèc ager ena sua Xau Assamblada Nacionau es naui pòbles que se higen ad aguest hilat a compdar de 2023, entre es que se trapen Arties e Garòs. Damb aguestes naues incorporacions, dejà son 3 es pòbles aranesi que cònsten coma pòbles mès polidi d’Espanha, amassa damb Bagergue.
Era sindica d’Aran, Maria Vergés, e eth conselhèr Josep Canut dejà receberen ath president dera associacion “Los Pueblos más Bonitos de España” eth passat mes de hereuèr, en tot mostrar er interès deth Conselh Generau d’Aran de trabalhar entà veir se d’auti pòbles dera Val d’Aran podien arténher tanben aguesta certificacion pr’amor deth positiu impacte que viuen es pòbles que se higen ad aguest hilat

Ena Xau Assamblada Nacionau de “Los Pueblos más Bonitos de España”, celebrada ager, se coneishèren es sies pòbles que passaràn a formar part dera associacion en 2023, entre eri, Arties e Garòs.

Cau rebrembar qu’eth passat mes de hereuèr, era sindica d’Aran, Maria Vergés, e eth conselhèr d’Economia, Torisme e Promocion Economica, Josep Canut, mantengueren ua amassada damb eth president dera associacion de “Los Pueblos más Bonitos de España”, Francisco Mestre, ena que tanben participèc eth president dera EMD de Bagergue, Marc Tarrau, damb qui analizèren eth positiu impacte que viuen es pòbles que se higen ad aguest hilat, coma ei eth cas de Bagergue, e mostrèren er interès deth govèrn deth Conselh Generau d’Aran de trabalhar entà veir se d’auti pòbles dera Val d’Aran podien arténher tanben aguesta certificacion.

“Deth govèrn d’Aran ençà èm plan satisfets de qu’es pòbles d’Arties e Garòs se poguen híger ad aguest hilat a compdar de 2023” manifestaue era sindica d’Aran, en tot híger que: “higer-se ad aguest projècte va en linha damb eth nau plantejament de sostenibilitat toristica que deth Conselh Generau ençà prebotjam, pr’amor que mos ajude a méter en valor er auviatge, cultura e istòria des nòsti pòbles”.

Cau destacar qu’aguesta associacion a coma principau objectiu méter en valor e dar votz a zònes preferentament ruraus e de petiti municipis e sajar d’implicar a diferentes administracions entà que les donguen supòrt e respecten eth sòn auviatge.