Vielha, 30 d’octobre de 2018.- Er Institut Europèu de Micologia (EMI) a celebrat era sua siesau Assemblada en Conselh Generau d’Aran. Era Assemblada comencèc damb ua recepcion presidida peth síndic d’Aran, Carlos Barrera, en un acte en qué tanben participèren era conselhèra de Torisme d’Aran, Anna Diaz, eth baile de Sant-Denis-De la Bouteillerie (Quebèc, Canadà) Jean Dallaire e eth director d’Investigacion deth CITA-Aragó e director der EMI, Fernando Martínez Peña.

Era Agropacion Europèa de Cooperacion Territoriau “European Mycological Institute” ei formada per sòcis de Castelha e Leon, Naua Aquitània, Occitània, Catalonha e Aragon (Deputacion d’Àvila, eth Centre Tecnologic Forestau de Catalonha, era Fondacion Auviatge Naturau de Castelha e Leon, era Region francesa d’Occitània e era Cramba d’Agricultura dera Dordonya-Perigord, eth Centre d’Investigacion e Tecnologia Agroalimentària deth Govèrn d’Aragon, er Ajuntament de Soria e eth Conselh Generau d’Aran.

Tanben participèren ena amassada representanti de BIOPTERRE-Canadà sòci non europèu der EMI e representanti deth sector dera micologia deth Canadà ena visita tecniciana per Espanha organizada des der EMI.

Pendent era assemblada, Fernando Martínez-Peña, director der EMI, presentèc eth nau projècte europeu SUDOE-CULINARY-HUBS damb er objectiu de crear un hilat europèu d’innovacion ena gastronomia responsabla der auviatge agroalimentari locau. Eth projècte compde damb eth supòrt d’arreconeishudi codiners estela Michelin, investigadors, nutricionistes e comunicadors, entà resòler rèptes concrèts a cada territòri, crear ua plataforma europèa d’escambi de coneishença e promòir eth torisme gastronomic internacionau.

Es sòcis deth projècte son:

• Centre de Recerca i Tecnologia Agroalimentària d’Aragó www.cita-aragon.es
• European Mycological Institute www.eumi.eu
• AgroParisTech www.agroparistech.fr/
• Basque Culinary Centre Fundazioa www.bculinary.com/es/home
• Cambra de Comerç de Barcelona https://www.cambrabcn.org/es
• Cambra d’Agricultura de Dordonya (Périgord). https://dordogne.chambre-agriculture.fr/
• Nucli Empresarial dóna Região de Bragança http://www.nerba.pt/pt/

Eth Conselh Generau d’Aran, en collaboracion damb Torisme Val d’Aran e era Societat Catalana de Micologia, organize des de hè 12 ans es Jornades Micologiques dera Val d’Aran.

Era recèrca e recuelhuda de misharnons ei ua activitat tradicionau fòrtaments arraïtzada ena Val d’Aran. Es boletaires e es aficionadi ara micologia creishen an darrèr an en un entorn favorable entara micologia. Per açò, e damb er objectiu de mantier es valors naturaus des ecosistèmes dera Val d’Aran, eth Conselh Generau d’Aran a iniciat diferentes accions pr’amor qu’era activitat de recuelhuda de misharnons non compromete era produccion e diuersitat de misharnons d’Aran, en tot potenciar ath madeish temps era educacion ambientau e eth trabalh scientific.

Cau arrebrembar que des der an 2014 eth Conselh Generau d’Aran regule era recolleccion de misharnons enes bòsqui dera Val d’Aran a trauès d’ua ordenança que permet que residents, proprietaris de dusaus residéncies e gent que pernocti es establiments toristics d’Aran, poguen arrecuélher misharnons as bòsqui sense còst.

D’alavetz eth Conselh Generau expedís uns talonaris enes ajuntaments e lotjaments otelèrs. Eth Govèrn d’Aran a installadi 42 panèus de senhalizacion enes pistes forestaus entà informar sus era nòrma d’arrecuelhudi misharnons en aranés, catalan, castelhan e francés.

Era Val d’Aran compde damb 556 espècies de misharnons identificadi des 3.000 catalogades en Catalonha.