Vielha, 12 de març de 2018.- Astrid Fina rider deth Centre d’Espòrts d’Iuèrn Adaptat dera Val d’Aran (CDIA) e membre dera FEDDF, a hèt istòria aué ena competicion de boardercross SBX de Pyeongchang 2018, ar arténher era medalha de bronze en aguesta especialitat.

Astrid Fina, que s’entrene abituauments en Baqueira Beret, entrèc en contacte damb eth CDIA hè 5 ans, dera man d’Andrés Gómez Sirat, dempús de que un accident de mòto en 2009 li cambièsse era vida quan se dirigie ath sòn trabalh. Dempús de passar un calvari de visites en espitaus e 13 operacions, sofric era amputación tibiau dera cama dreta. Era barcelonesa trobèc en snowboard era salvacion entà tornar a gaudir dera vida.

Aguesta ei era dusau participacion dera rider enes Jòcs Paralimpics a on obtenguec Diplòma Paralimpic en Sochi 2014.

Eth Centre d’Espòrts d’Iuèrn Adaptat dera Val d’Aran ei un centre de naut rendiment, deteccion de talents, tecnificacion d’esportistes e formacion de tecnics esportius especialistes enes espòrts d’iuèrn entà persones membres des federacions espanhòles d’Andicapats Fisics e Paralisis Cerebrau, qu’arrecep eth supòrt deth Conselh Generau d’Aran, era Deputacion de Lhèida, er Ajuntament de Naut Aran, eth Conselh Catalan der Espòrt, atau coma deth Conselh Superior d’Espòrts, eth Comitat Paralimpic Espanhòl, Fondacion Jesús Serra e dera Fondacion Repsol.

Eth conselhèr d’Espòrts d’Aran, Luís Carlos Medina, felicite des deth Conselh Generau d’Aran a Astrid Fina per èxit artenhut e la anime a contunhar en tot trabalhar per espòrt der esquí adaptat des dera Val d’Aran.

Astrid Fina tornarà a concórrer eth diuendres 16 ena pròva de Banked slalom damb naues opcions de medalha.