• Enquiara sonque s’auien comprovat atac d’os sus equin en mascle Goiat

• “Vam a prepausar ara Generalitat de Catalonha era modificacion deth decret 176/2007 entà equiparar es indemnizacions que se reben ena Val d’Aran per atac d’os as dera rèsta de territòris vesins, a on son mès nautes”, afirme eth conselhèr de Territòri, Paisatge e Gestion Ambientau

Ager dimenge, eth mascle d’os Cachou ataquèc e consumic ua polhina d’uns 4 mesi en municipi de Vielha e Mijaran. Aguest ei un hèt remercable, ja que sonque s’auien comprovat atacs sus equin en mascle Goiat, eth quau a arribat a depredar cavales adultes.

Er os Cachou siguec capturat en mes de mai d’enguan e se li placèc un colièr GPS entath sòn seguiment. Gràcies ad aguest colièr, s’a podut comprovar que aguest os ei fòrça predador, ja qu’a efectuat diuèrsi atacs pendent er ostiu, principauments a assentaments apicoles e crabes. Pr’amor d’aguest colhar e d’autes indicis coma es emorragies e es ematòmes s’a podut verificar era autoria d’aguest atac.

Era prevencion sus bestiar equin ei fòrça dificil, pr’amor que non ei viable agropar-lo e protegir-lo pera net coma se hè damb er ovin. Ath delà, es moviments nocturns des ossi son imprevisibles e eth descalatge dera recepcion dera senhau deth colièr GPS hè molt dificil era proteccion efectiva d’aguest bestiar. Maugrat açò, des deth Conselh Generau d’Aran se considère qu’ei de besonh aplicar mesures de condicionament aversiu coma s’a sajat damb Goiat.

Eth conselhèr de Territòri, Paisatge e Gestion Ambientau, Francisco Bruna, a manifestat qu’eth govèrn d’Aran “trabalhe entà balhar era major informacion possible as ramadèrs e aufrir-les eth supòrt tecnic de besonh entà afrontar aguesta problematica.

Atau madeish, a declarat que “vam a prepausar ara Generalitat de Catalonha era modificacion deth decret 176/2007, deth 31 de junhsèga, regulador des procediments de compensacion de damatges e perjudicis causadi ara agricultura e ramaderia per espècies animaus protegides dera fauna, entà equiparar es indemnizacions que se reben ena Val d’Aran per atac d’os as dera rèsta de territòris vesins, a on son mès nautes”.