• Era sindica d’Aran, Maria Vergés, a visitat aguest maitin era naua Sala Centrau de Pompièrs-Emergéncies, gràcies ara quau eth nòste còs de Pompièrs d’Aran guanharà efectivitat ena gestion des emergéncies en territòri, en tot deishar de depéner de forma dirècta dera Sala Centrau de Bombers dera Generalitat, plaçada en Bellaterra

Era Sindica d’Aran, Maria Vergés, acompanhada peth Major de Pompièrs, Manel Bosch e eth cap d’operacions de Pompièrs-Emergéncies, Eric Vilo, a visitat aguest maitin era Sala Centrau plaçada en CEI de Casau, qu’ei a on se receberàn totes es alèrtes de proteccion civila, emergéncies e servicis sanitaris extraespitalaris relacionadi damb era Val d’Aran a compdar de gèr de 2022.

“Pr’amor dera competéncia qu’er article 72 dera Lei d’Aran autrege ath Conelh Generau d’Aran en matèria de gestion des servicis d’emergéncies e proteccion civila, eth plaçament dera nòsta pròpria Sala Centrau ère un servici fòrça de besonh entath nòste territòri”, afirmaue era sindica d’Aran, en tot híger que: “aguest nau servici supausarà ua major efectivitat e aproparà era gestion dera emergéncia ath territòri”.

Eth Major des Pompièrs declaraue que “damb aguest servici, es comunicacions ath 112 qu’agen a veir damb era Val d’Aran, en compdes de derivar-se prumèr tara Sala Centrau de Bombers dera Generalitat en Bellaterra e dempús tà Pompièrs, passaràn a arribar directament ara nòsta centrau, çò que supause un escuerçament des tempsi que pòt resultar vitau”.

Aguestes melhores s’amien a tèrme laguens deth marc der acòrd entre eth Conselh Generau d’Aran e era Generalitat de Catalunya entara Gestion Integrau d’Emergéncies en Aran.

Atau madeish, cau rebrembar qu’aguesta Sala compdarà damb ua placa dedicada ara memòria de Joan Canalias, coma mòstra d’aumenatge a toti es ans dedicadi ath còs de Pompièrs d’Aran.