• Aguest maitin s’a amiat a tèrme ua amassada damb es Ajuntaments e EMD’s dera Val d’Aran, ena qu’es tecnics responsables an explicat es auanci en projècte de gestion sostenible deth Conselh Generau, qu’a coma objectiu poder gestionar es recorsi forestaus dera Val d’Aran mejançat ua silvicultura activa, respectuosa damb era biodiversitat e generadora de lòcs de trabalh

Era sindica d’Aran, Maria Vergés, a presidit, amassa damb eth conselhèr de Territòri, Paisatge e Gestion Ambientau, Francés Bruna, era amassada damb es alcaldes e alcaldesses des Ajuntaments dera Val d’Aran e es presidents/es des EMD’s deth territòri, ena qu’es tecnics a cargue deth projècte an explicat es auanci en aguesta matèria e an responut as sòns dubtes e demanes.

“Hè dejà un an que deth Conselh Generau ençà trabalham damb es Ajuntaments e EMDs d’Aran en aguesta naua estrategia forestau, que se base en un profitament sostenible des nòsti recorsi, en tot apostar pera bioeconomia e es energies renovables”, explicaue era sindica d’Aran, Maria Vergés, en tot híger tanben que: “recuperar era gestion forestau ei clau entà arténher uns bòsqui mès resilents ath cambi climatic e as incendis forestaus, ath temps que podem generar ua economia verda ath torn des nòstes montanhes que mos permete diversificar era nòsta activitat economica”.

En aguest sens, era sindica d’Aran manifestaue que: “entath Conselh Generau d’Aran ei imprescindible compdar damb era collaboracion e participacion des ajuntaments e EMD’s en tot aguest procès, coma propietaris des bòsqui” e destacaue que’aguest “non ei un projècte puntuau, senon que respon a ua vision de futur de gestion sostenible dera Val d’Aran”.

Un des principaus assessors d’aguest projècte a estat eth decan deth Colegio Oficial de Ingenieros de Montes, professor dera Universitat Politecnica de Valencia (UPV) e expèrt ena matèria, Eduardo Rojas, qu’asseguraue qu’auançar ena gestion des bòsqui aranesi e er usatge des sòns recorsi ei “ua contribucion climatica clau, qu’ath delà genère trabalh locau e afavorís a ua major resiliéncia des bòsqui” e qu’a destacat er enorme potenciau forestau dera Val d’Aran, que poirie plaçar-çe coma un des territòris referents de tot eth país en aguesta matèria.

“A dia d’aué, a despièch qu’es donades indiquen un excés de densitat des masses forestaus damb 5 milions de tones e un creishement dera existéncia de husta enes nòsti bòsqui de 87.000 tones annaus, eth sector forestau ena Val d’Aran ei infrautilizat e, de hèt, Aran ei eth territòri deth Pirenèu catalan damb menor grad de profitament deth creishement”, afirmaue eth conselhèr de Territòri, Paisatge e Gestion Ambientau, Francés Bruna, en tot híger que “aguest projècte de gestion forestau sostenible serà eth punt de partida entà gestionar es nòsti recorsi mejançat ua silvicultura activa, respectuosa damb era biodiveritat, era fauna e eth torisme, atau coma generadora d’activitat e lòcs de trabalh”.