• Aguest centre integrau de formacion, que plaçarà Aran coma territòri de referéncia en encastre des rescats en montanha e ajudarà a diversificar era economia deth territòri, compdarie damb un simulador de rescat damb elicoptèr a dimensions reaus e tecnologia punta tara simulacion d’operacions, protocòls e actuacions a trauès de mieis aerians

Eth Conselh Generau d’Aran, dera man de Pompièrs-Emergéncies, eth Centre d’Innovacion Territoriau HèPic, seguís trabalhant entà desvolopar eth projècte deth Centre de Formacion de Rescats en Montanha dera Val d’Aran.

Un Centre de Formacion SAR (Centre de Recèrca e Rescat), ei un espaci de simulacion de rescat damb elicoptèr a dimensions reaus, a on se pòden simular es manòbres de rescat laguens dera nau. Aguest projècte se plantege ath torn de tres èishi principaus: eth dera seguretat pr’amor qu’aguest format permet mès ores de practica sense depéner des condicionants extèrns, eth d’èster ua infraestructura sostenibla ambientauments pr’amor dera reduccion d’emissions CO² en aguestes formacions, e eth der estauviament economic en ores d’elicoptèr.

Er objectiu d’aguest equipament ei eth de crear un centre integrau de formacion, autant entà rescatadors/es e activitats de montanha, coma entà quinsevolh besonh derivat de vòls en elicoptèr. Entad açò, se compdarie damb un simulador d’operacions SAR que contemple tecnologia punta a nivèu mondiau entara simulacion d’operacions que permeterie ad aguest centre èster un punt de trobada a nivèu nacionau en matèria d’innovacion en operacions, protocòls e actuacions a trauès de mieis aerians.

Aguest projècte, en que se pòrte lèu 3 ans trabalhant, serie pionèr e plaçarie Aran coma territòri de referéncia, pr’amor qu’en Euròpa sonque i a un centre damb aguest tipe de formacion e caracteristiques plaçat en Bad Tölz, Alemanha, atau madeish ajudarie ara diversificacion economica deth territòri.

Eth projècte prevé ua inversion d’ath torn de 8 milions d’euròs e era participacion de diuèrsi agents, autant publics coma privadi, coma ei eth Conselh Generau d’Aran mès tanben d’autes administracions pera sua importància a nivèu estatau e tanben inversions privades. Ei previst qu’eth centre se place en Baish Aran.