Vielha, 24 de gèr de 2018.- Eth Conselh Generau d’Aran a acuelhut es reünions tecniques d’organizacion entà acabar de perfilar era 39au edicion dera Marxa Beret as qu’a assistit eth vicesindic d’Aran e director dera Marxa Beret, Luis Carlos Medina, e representants de Baqueira Beret, dera FECH, Pompièrs d’Aran, Mòssos d’Esquadra, SABS e Era Escòla.
Era 39au Marxa Beret ei ua des pròves d’esquí nordic mès assolidades des que se realizen eth territòri nacionau e cada an compde damb mès de 1.000 participaires provenenti de tota Euròpa. Organizada peth Conselh Generau d’Aran e Baqueira Beret, ei inscrita en circuit de Marches Populars (Popular Cross-Country Race) deth calendari FIS (Federacion Internacionau d’Esquí). Era 39au Marxa Beret ei ua pròva puntuable deth circuit de Copa Espanha RFEDI e puntuable entath circuit de Copa Catalana.
Ua des novetats a destacar ei qu’enguan eth Sprint Salomon se disputarà en Beret eth dissabte 3 de hereuèr tas 12 ores. Eth Sprint Salomon ei ua pròva d’exibicion ena que i participe un nombre limitat de corredors d’elèit (36), damb er objectiu de hèr a conéisher aguest espòrt.
Eth dimenge, 4 de hereuèr tas 10 ores, se disputarà era 39au Marxa Beret, damb un circuit de 10Km ena zòna de Beret e Òrri; de 21Km ena zòna de Beret, Òrri e Montgarri e fin finau eth circuit de 42Km ena zòna de Beret, Òrri, Montgarri e en direccion Marimanha. Enguan s’a trabalhat ena milhora e increment dera senhalizacion deth circuit enes tres categories de competicion.
Es inscripcions les cau realizar per Internet a trauès dera pagina web dera Marxa Beret www.marxaberet.com. Es inscripcions presenciaus, recuelhuda de dorsaus e documentacion dera corsa, debanaràn ena Casa d’Acuelhuda, ena poblacion de Salardú, eth dissabte 3 de hereuèr a compdar des 09.30 enquias 20.30 ores. Ena madeisha Casa d’Acuelhuda debanarà era presentacion oficiau dera 39au Marcha Beret eth dissabte tas 19.30 ores.
Era Marxa Beret, qu’an darrèr an recupère eth sòn caractèr popular damb era intencion de convertir-se ena hèsta der esquí nordic, ei era pròva d’esquí de hons popular en estil classic mès multitudinària d’Espanha.
