• Ath long deth dia d’aué, era sindica d’Aran e eth conselhèr d’Abitatge e Agenda Urbana, an mantengut ua amassada damb er equip tecnic deth Conselh Generau d’Aran e ua auta damb es Ajuntaments aranesi entà compartir es resultats deth procés de participacion ciutadana e es entrevistes damb es Ajuntaments que participen en aguest Plan, expausar es prepauses e definir quina a d’èster era estructura deth Plan d’Abitatge dera Val d’Aran

Pendent eth dia d’aué, era sindica d’Aran, Maria Vergés, e eth conselhèr d’Abitatge e Agenda Urbana, Andreu Cortés, an mantengut ua session damb er equip tecnic deth Conselh Generau d’Aran e ua amassada de trabalh damb es Ajuntaments aranesi que prenen part deth Plan d’Abitatge dera Val d’Aran, impulsat peth govèrn d’Aran.

“Deth govèrn d’Aran ençà èm conscients qu’era dera viuenda ei ua qüestion que reclame solucions urgentes en nòste territòri pr’amor dera manca d’abitatge assequible que trauessam e èm comprometudi a hèr tot çò que sigue ena nòsta man entà aufrir alternatives que mos permeten melhorar era grèu situacion actuau” asseguraue era sindica d’Aran, en tot híger que: “entad açò, resulte indispensable qu’eth Conselh Generau d’Aran pogue arténher mès competéncies, dotades coma cau, en aguest àmbit que li permeten anar mès enlà de çò que pòt hèr ara, sense desbrembar que, atau e coma mèrque er article 137 der Estatut d’Autonomia de Catalunya, era competéncia exclusiva en matèria d’abitatge correspon ara Generalitat”.

A trauès d’aguest Plan, eth govèrn deth Conselh Generau d’Aran amie a tèrme un triple trabalh: ua analisi dera situacion, identificant de manèra qualitativa e quantitativa es principaus problematiques e potencialitats; ua diagnòsi compartida dera situacion actuau en territòri e en cada municipi, autant en relacion damb es problematiques coma en relacion as actuacions que s’amien a tèrme actuaument, e ua definicion des politiques d’abitatge que se pòden desvolopar deth Conselh Generau d’Aran ençà.

“Dempús deth trabalh realizat pendent es darrèri mesi a trauès deth procés de participacion ciutadana e es entrevistes e enquèstes damb es Ajuntaments que participen en aguest Plan, aué auem compartit en aguestes dues amassades es resultats obtengudi en estudi prèvi, s’an expausat es prepauses e s’a definit quina a d’èster era estructura deth Plan d’Abitatge d’Aran”, explicaue eth conselhèr Cortés, en tot híger que: “era volontat deth govèrn aranés ei elaborar un plan a on se poguen includir a toti es agents e èster çò de mès transversaus possibles”.

Aguest Plan de Viuenda compde damb era participacion de toti es Ajuntaments aranesi exceptat deth de Naut Aran, qu’a declinat  participar-i, e s’i trabalhe de forma transversau damb diferents departaments deth Conselh Generau d’Aran coma es servicis tecnics, era Oficina de Locau de Viuenda, Servicis Assistenciaus Integrats o era Oficina de Joenessa, entre d’auti.