• Aguest projècte, prebotjat peth Conselh Generau d’Aran, fomente eth comèrç locau e artesanau e aurà lòc pendent es dissabtes de junh e junhsèga en Vielha e ath long de tota era setmana en diuèrsi pòbles dera Val d’Aran pendent eth mes d’agost

Aguest dissabte se met en foncionament era dusau edicion dera iniciativa deth Conselh Generau d’Aran “Mercats d’Aran”, un projècte qu’a coma objectiu fomentar eth comèrç artesanau e agroalimentari dera Val d’Aran e que compde damb era collaboracion dera Deputacion de Lleida.

“Aguesta ei ua iniciativa que fomente eth comèrç locau e artesanau en territòri, damb productes de proximitat de tot tipe” afirmaue eth conselhèr d’Economia, Torisme e Promocion economica, Juan Antonio Serrano, “ath delà, pendent eth mes d’agost, en èster un mercat itinerant aufrís era possibilitat de dinamizar es pòbles enes que se realize pendent era setmana”.

Enguan, aguesta iniciativa non sonque s’amiarà a tèrme pendent eth mes d’agost, senon que s’amiarà a tèrme es dissabtes en Vielha (ena avenguda Pas d’Arró) pendent es mesi de junh e junhsèga e entre setmana, en diferents pòbles dera Val d’Aran, pendent eth mes d’agost.

“Damb aguesta iniciativa non sonque prebotjam eth consum locau, senon que tanben aufrim ua activitat atractiva as persones que mos visiten pendent er ostiu, pr’amor qu’ath delà des parades de productes artesanaus e agroalimentaris, s’aufriràn tanben actuacions musicaus e diuèrsi espectacles entà tota era familha entà amenizar aguestes serades e aufrir ua melhor experiéncia as nòsti visitants”, senhalaue eth tanben conselhèr d’Economia, Torisme e Promocion economica, Josep Canut.