Vielha, 21 d’abriu de 2016.- Eduardo Puente, director des d’aguesta sason deth Centre Especializat de Tecnificacion Esportiua d’Espòrts d’Iuèrn dera Val d’Aran (CETEI), hè ua avaloracion fòrça positiva des resultats obtengudi pes joeni esportistes d’elèit qu’an passat peth centre de tecnificacion aranés aguesta sason, tant en çò que tanh as resultats esportius coma academics.
Eth Centre de Tecnificacion Esportiua d’Espòrts d’Iuèrn dera Val d’Aran ei en foncionament des der an 2012, e dempús d’ans de trabalhs intensi per part des institucions, es clubs e es entitats privades, a artenhut un prestigi qu’ac place ath mès naut nivèu en çò que tanh a centres des madeishes caracteristiques.
Eth Centre de Tecnificacion Esportiua d’Espòrts d’Iuèrn dera Val d’Aran, ligada ara Reau Federacion Espanhòla d’Espòrts d’Iuèrn (RFEDI) e ara Federacion Catalana d’Espòrts d’Iuèrn (FCEH), a per objectiu contribuïr ara progression de joenes promeses e velhar pera sua formacion integrau. Es esportistes seleccionadi arreceben formacion tecnica/esportiua e academica, ath delà d’un seguiment medic/psicologic entà garantir un estat de salut avient entara practica esportiua e ua gessuda professionau de futur.
Eth centre a acuelhut aguesta sason 64 esportistes, qu’an compdat damb un staff tecnic integrat per 9 entrenadors, qu’an contribuït a qu’es esquiaires deth CETEI agen obtengut uns resultats fòrça per deuant d’esportistes d’auti centres de tecnificacion deth rèste d’Espanha.
En çò que tanh ara formacion academica, eth director Eduardo Puente a volut destacar tanben eth trabalh desvolopat pes 5 professors der IES d’Aran en contorn pedagogic, qu’an mercat eth naut grad d’exigéncia demanada as esportistes, que tanben en aguest aspècte an obtengut boni resultats. Tot açò acompanhat d’auti valors ena formacion integrau personau des joens, restacadi damb eth sòn sojorn ena residéncia, eth bon comportament, contraròtle d’oraris e assisténcia tant sanitària coma a nivèu psicologic e mentau, aspècte fòrça important quan se tracte d’esportistes de naut rendiment.
En çò que tanh ara pròplèu sason, Puente a remercat qu’er objectiu contunhe en tot èster que deth Centre Especializat de Tecnificacion Esportiua d’Espòrts d’Iuèrn dera Val d’Aran (CETEI), gesque eth maxim nombre possible d’esquiaires entara equipa nacionau, e seguir en tot melhorar ena coneishença des circuits internacionaus, que va ligat damb auta exigéncia formativa coma ei era dera coneishença e era practica d’idiòmes, tant per part des esportistes coma des entrenadors.