Ues 3000 persones an passat pera zòna de Beret entà animar as esportistes pendent aguesta finau de Copa deth Mon ena Val d’Aran

Es productes tradicionaus dera Val d’Aran coma era Òlha Aranesa tanben an estat protagonistes en Village dera zòna de Blanhiblar

Vielha, 2 de març de 2019.- Es finaus deth dissabte 2 de març an barrat dues magnifiques jornades en que s’a disputat era Copa deth Mon de snowboard cross FIS en Baqueira Beret. Era estacion aranesa que ja acuelhec aguesta pròva er an 2016 a estat testimòni deth melhor espectacle sus ua taula de snowboard.

Ena competicion femenina, era prumèra plaça siguec entara chèca Eva Samkova, de 25 ans, qu’a liderat totes es baishades enes qu’a participat. Gràcies ad aguest bon resultat, puge un prumèr lòc en classament generau damb 3.400 punts, era madeisha puntuacion qu’obten era nòrd-americana Lindsey Jacobellis de 33 ans qu’a demorat en tresau posicion en pòdium de Beret. Atau es causes, es dues riders aucupen era prumèra posicion deth classament. Dempús deth liurament de prèmis, Samkova coheissèc èster “fòrça erósa, era carrèra a estat fòrça divertida damb un gran traçat e creigui que tot eth mon s’ac a passat en gran. Tot a anat sus arròdes, ua grana organizacion e a estat un gran dia”. Tanben mencionèc “qu’ei fòrça esmovent tà jo qu’en prumèr lòc age ua egalizacion de punts en classament dera Copa deth Mon de SBX”.

Eth dusau lòc en pòdium a estat entara francesa Chloe Trespeuch, de 24 ans e eth quatau lòc entara tanben francesa Nelly Moenne Loccoz, de 28 ans.

Eth guanhador dera finau celebrada ena estacion dera Val d’Aran a estat er austriac Alessandro Haemmerle, de 25 ans, qu’a liderat totes es rondes des finaus. En finalizar era competicion, eth vencedor a declarat: “M’encante èster ací de nau. Venguí hè 3 ans e me sentí fòrça comòde e aué aguest traçat m’a resultat familhau de nau e è pogut demostrar eth mèn melhor snowboard. Sò fòrça content”.

Eth dusau en crotzar era linha de mèta siguec er australian Adam Lambert, de 21 ans, e eth canadian Kevin Hill, de 32 ans, que tanben pugèc ath pòdium ena Copa deth Mon de SBX de Baqueira Beret en 2016, a barrat eth pòdium damb un tresau lòc. Eth quatau en arribar siguec eth nòrd-american Mick Dierdorff de 27 ans.

Maugrat auer guanhat es classificatòries deth diuendres e mercar un bon ritme enes ueitaus de finau, eth rider dera Reau Federacion Espanhòla d’Espòrts d’Iuèrn (RFEDI), Lucas Eguibar, de 25 ans, a sofrit ua casuda en quataus de finau en ua ajustada baishada. Coma resultat finau eth basc a estat eth 13au dera finau. Pera sua part er olimpic Regino Hernández, de 27 ans, non a artenhut passar de ueitaus de finau en ua baishada qu’a dominat enquiara darrèra corba, mès un petit error ena conduccion li a penalizat e es sòns rivaus ac an superat abans de mèta. Er andalós a estat eth 26au.

Eth sindic d’Aran, Carlos Barrera, qu’a assistit ara finau dera Copa deth Mon SBX en Beret, expliquèc qu'”arrecéber ua pròva tan importanta coma aguesta en dues escasences en tres ans demòstre eth naut nivèu d’organizacion de Baqueira Beret e era grana capacitat dera Val d’Aran entà acuélher pròves esportiues de prumèr nivèu mondiau, donques qu’un còp mès, fòrça espectadors en tot eth mon an pogut conéisher eth nòste país”. Barrera a arregraït er esfòrç dera estacion Baqueira Beret e des patrocinadors e institucions qu’an hèt possible aguest eveniment esportiu.

Francis Coll, director generau de Baqueira Beret, comentèc qu’entà era estacion “era competicion d’aguest iuèrn a reafirmat era capitada que ja s’apletèc ena edicion de 2016 e mos dèishe clar qu’aguesti eveniments damb cobertura televisiva internacionau son ua grana manèra de dar a conéisher era Val d’Aran, Baqueira e eth potenciau des Pirenèus en mon”.

Eth president dera Reau Federacion Espanhòla d’Espòrts d’Iuèrn, er aranés May Peus España, qualifiquèc d’excellent era organizacion de Baqueira Beret, damb era implicacion de tota era Val d’Aran en coordinacion damb era RFEDI, e manifestèc que “segur qu’era FIS vò tornar en Beret en ua naua edicion. En çò que tanh as resultats esportius entà Espanha, aué non an gescut, encara qu’arribàuem en fòrça bona forma, coma demostrèc ager Lucas Eguibar en tot mercar eth melhor temps enes classificatòries en tot èster prumèr e Regino damb era sua magnifica ueitau posicion. Aguest dissabte enes eliminatòries, simplaments era sòrt non mos a acompanhat”.

Ara finau dera Copa deth Mon SBX en Baqueira Beret tanben a assistit eth vicesindic d’Aran e baile de Naut Aran, Cesar Ruiz Canela, eth secretari generau der Espòrt dera Generalitat de Catalonha, Gerard Figueras, eth president de Baqueira Beret, Aureli Bisbe e era conselhèra de Torisme d’Aran, Anna Díaz, entre d’auti.

Ues 3000 persones an passat pera zòna der eveniment en Beret entà animar as esportistes pendent aguesta finau. ena zòna de Blanhiblar an gaudit der espectacle damb sauts qu’es corredors arribauen a volar enquia 20 mètres, mentre provauen es productes tradicionaus dera Val d’Aran en Village, coma era coneishuda Òlha Aranesa. En finalizar era pròva, es participaires e eth public an viscut ath maximal era hèsta de clausure en Village damb eth DJ Serx Einheri.

En totau, 91 snowboarders s’an desplaçat en Baqueira Beret (56 òmes e 35 hemnes) procedentes de 17 païsi: Alemanha (7), Andòrra (1), Argentina (1), Australia (6), Àustria (9), Canadà (9), Espanha (2), Estats Units (16), França (9), Finlàndia (1), Itàlia (11), Japon (2), Païsi Baishi (1), Polònia (1), Gran Bretanha ( 2), Republica Chèca (4) e Soïssa (9).

Era Copa deth Mon de SBX de Baqueira Beret a compdat damb eth patrocini de Movistar e era companhia Seguros Catalana Occidente.

Era pròva ena Val d’Aran a compdat damb eth supòrt d’institucions esportiues coma eth Conselh Catalan der Espòrt (CCE), amassa damb era RFEDI (Reau Federacion Espanhòla d’Espòrts d’Iuèrn) e era collaboracion des institucions araneses coma eth Conselh Generau d’Aran, er ajuntament de Naut Aran e Foment Torisme Val d’Aran, ath delà dera Deputacion de Lhèida. Tanben cau arrebrembar era vinculacion des clubs aranesi d’esquí e dera Associacion Volentaris d’Aran.

Info: Baqueira Media