Era nauau etapa deth Tour gesserà de Vielha (Val d’Aran) e finalizarà en Arcalís (Andorra) eth 10 de junhsèga.
Eth Tour començarà eth 2 de junhsèga en Mont-Saint-Michel, ua gessuda espectaculara que reivindique era vocacion deth Tour entà mostrar es bereses deth territòri.
FOTO: Jordi Estruch
Eth Musèu Colet de Barcelona, a acuelhut aguest maitin era presentacion dera 9au etapa deth Tour de France entre Vielha (Val d’Aran) e Arcalís (Andorra) eth pròplèu 10 de junhsèga damb 184 quilomètres. Er acte a estat presidit peth sindic d’Aran, Carlos Barrera, peth director generau dera policia, Albert Batlle, peth cap deth Comissariat Superior de Coordinacion Centrau e cap deth dispositiu, eth comissari, Ferran López, e peth secretari generau der Espòrt, Gerard Figueras, qu’an explicat es accions previstes entà garantir era seguretat dera pròva ciclista mès importanta deth mon, era mobilitat e eth civisme.
FOTO: Jordi Estruch
Era presentacion a compdat tanben damb era preséncia deth conselhèr de Territòri d’Aran, Jose Antonio Boya, e deth president dera Federacion Catalana de Ciclisme, Josep Bochaca.
Era 9au etapa serà era jornada estellara enes Pirenèus, damb gessuda en Vielha, a 1.105 mètres, un recorregut de 184 km e arribada ena localitat andorrana d’Arcalís, damb còta 2.240 m. Peth prumèr còp, Vielha- Val d’Aran ei era gessuda d’ua etapa deth Tour, a on se poderà víuer eth gran ambient deth Tour.
En çò que tanh as 5 pòrts de montanha qu’es ciclistes auràn de superar, i a era Bonaigua, ja enes prumèrs quilomètres de carrèra damb eth sòn punt mès naut en 2.072 m. Dempús de Sort, es ciclistes encararàn er interminable Pòrt deth Cantó (1.721 m) e un còp en Andorra, auràn de superar era Comella (1.347 m) e eth Còth de Beixalís (1.796 m) entà crotzar mèta a 2.240 m en Arcalís.
FOTO: Jordi Estruch
Eth secretari generau der Espòrt, Gerard Figueras, a assegurat qu’eth Tour pòt apostar “damb tranquillitat” per aguesta etapa pr’amor qu’ “en Catalunya èm un referent esportiu a nivèu de participacion mès tanben per çò que tanh ara capacitat organitzatiua”. Figueras a hijut qu’acuélher era etapa refortilhe era vinculacion cada viatge mès fòrta entre torisme e espòrt, que “projècte eth país en mon e genère aucupacion ena restauracion, ena oteleria e es sectors vinculadi”.
Pera sua banda, eth director generau dera policia, Albert Batlle, a reconeishut que se tracte d’ua etapa damb ua “extraordinària complexitat organizatiua”, ena qu’ei prevista era assisténcia de 25.000 espectadors, que requerís “un dispositiu de seguretat superior ath d’ua etapa ciclista normau”, era quau causa mobilizarà 664 agents pendent es tres dies en qué serà activat eth dispositiu. Eth cap deth Comissariat Superior de Coordinacion Centrau e cap deth dispositiu, eth comissari Ferran López, a assegurat qu’ “eth Tour de France ei era 3au pròva esportiua mès importanta deth mon”, e qu’aguest dispositiu trabalharà entà garantir era mobilitat e era seguretat dera caravana ciclista, e procurarà minimizar era afectacion viària provocada pes talhs de circolacion enes carretères afectades. Eth centre de coordinacion serà plaçat en Vielha.
Fin finau, eth sindic d’Aran, Carlos Barrera, a arrebrembat er exit dera finau d’etapa celebrada en Plan de Beret hè dètz ans e a soslinhat er impacte economic qu’aurà eth pas deth Tour pera Val d’Aran -sonque es pernoctacions dera equipa organitzatiua dera pròva deisharà 35.000 èuros- e, sustot, “era repercussion mediatica d’auer ua ora de television en dirècte” en tot mostrar aguest territòri e eth Pirenèu. “Per aqueres dates, ja non i a cap lhet liure en un radi de 70 km ath torn de Vielha”, a anonciat, ath madeish viatge qu’a soslinhat era collaboracion entre es institucions (Conselh Generau d’Aran, Ajuntament de Vielha e Mijaran, Ajuntament de Naut Aran, Secretaria Generau der Espòrt, Deputacion de Lleida e Baqueira Beret) per cofinançar eth còst d’acuélher aguest eveniment.
Vielha, 28 de junh de 2016
Conselh Generau d’Aran: Núria Sanjuan
Hònt: Secretaria General de l’Esport