Vielha, 1 d’octobre de 2018.- Eth Conselh Generau d’Aran amie a tèrme pendent aguesta tardor ua seria d’accions enes pistes forestaus laguens des trabalhs de melhora e conservacion des accèssi ar auviatge naturau e culturau dera Val d’Aran.

Aguesta setmana entre es dies 1 e 7 d’octobre, demoraràn barrades de deluns a diuendres es pistes de St. Joan, de Varradòs en Vilamòs pendent es 24 ores deth dia; de Varradòs, deth horcadís d’Arròs enquia Bòrdes dera Artiga de 08:00 a 13:00 ores e de 14:30 a 19:30 ores; dera Artiga de Lin, deth Pònt deth Còc ath parcatge dera Ermita e enquiath Plan dera Artiga de dimèrcles a diuendres de 08:00 a 13:00 ores e de 14:30 a 19:30 ores; de Mina Victòria de dera Bassa d’Arres enquia Bossòst, pendent es 24 ores deth dia.

Era pista de Mina Victòria, d’Arres de Sus ara Bassa d’Arres; e de Valarties, deth Pònt de Valarties ath Plan de Nera, demoraràn dubèrtes tota era setmana.

Ei important arrebrembar que tant es talhs puntuaus coma totaus (Veir grafic adjunt) se produsiràn de deluns a diuendres enes pistes de St. Joan, Varradòs e Artiga de Lin, e enquiath dissabte en cas dera Mina Victòria. Er accès as pistes pendent era dimenjada serà dauridi.

Es accions enes pistes forestaus des trabalhs de melhora e conservacion des accèssi ar auviatge naturau e culturau dera Val d’Aran, les amie a tèrme eth Conselh Generau d’Aran damb era collaboracion deth Hons Europèu de Desvolopament Regionau (FEDER), era Deputacion de Lhèida e era Generalitat de Catalonha a trauès deth departament de Politiques Digitaus e Administracion Publica.