Eth joen aranés deth CAEI, Pèir Cónsul.

Era dimenjada passada, 10 e 11 de gèr, se disputèren ena estacion de Masella es prumères pròves puntuables dera Liga Catalana d’esquí aupin ena Categoria d’U14.

A causa dera fauta de nhèu calec anullar eth GS deth dissabte e se realizèren dus eslaloms, mès açò non empedic qu’es corredors deth CAEI hessen un bon papèr enes pròves.

Eth dissabte, er aranés Pèir Cónsul e Carlota Pomes, se demorèren as pòrtes deth trionf, en tot arténher un meritat dusau lòc enes sues respectives categories.

Eth dimenge semblaue que tot anaue a gésser redon pr’amor qu’es corredors deth CAEI acabèren era prumèra manja en tot aucupar es 3 posicions de cap, mès sonque Pèir Cónsul e Álvaro Chalbaud sigueren capables de sostier era pression e mantier-se era prumèra e dusau posicion respectivaments. Non siguec aguesta era sòrt de David Eseverri e Carlota Pomes que dempús d’ua bona prumèra manja, que les plaçaue tresaus enes sues respectives categories, cometeren bèri errors ena dusau manja que les aluenhèren deth pòdi.

Ara aguesti corredors an ua dimenjada d’entrenament entà poder preparar era pròplèu competicion que se disputarà ena Molina. Se tracte dera pròva en tot correspóner ara 1ª Fasa dera Copa Espanha ena quau eth club aranés serà representat per 14 esportistes que se guanhèren era plaça dempús dera competicion d’aguesta dimenjada.