• Aguest procès a coma objectiu conéisher de prumèra man es besonhs, idees e inquietuds des joenes e joeni deth territòri.

Eth Conselh Generau d’Aran, a trauès dera Oficina de Joenessa des Servicis Sociaus, a daurit un procès participatiu entara joenessa deth territòri, d’edats comprenudes entres es 14 e es 30 ans.

Er objectiu d’aguest procès ei recuélher es besonhs, idees e inquietuds d’aguest collectiu entà poder definir politiques de joenessa, a trauès de diuèrses dinamiques, tà recuélher informacion de prumèra man.

Aguest procès contemple trobades orientatives e presenciaus tà establir un grop organitzat de joenessa que permete crear un canau bidireccionau de comunicacion entre eth Conselh Generau e era Joenessa.

Eth passat dimèrcles se hec era prumèra trobada de participacion presenciau, a on i participèren  joeni, d’entre 15 e 20 ans, deth pòble de Les.

Era trobada siguec avalorada de manèra positiva, pr’amor qu’aguesti espacis d’amassada permeten refortir era participacion juvenila, e er objectiu ei hèr-ne mès entà qu’era joenessa sigue era vertadèra protagonista ena construccion dera vida deth territòri. Resultèc èster un espaci fòrça agradiu, qu’acabèc damb era aportacion des joeni demanant mès trobades coma aguesta.

Tara conselhèra de Joenessa, Igualtat e Inclusion Sociau, Maria Menis: “En Govèrn d’Aran pemsam qu’eth collectiu des joeni ei un collectiu fòrça important, e daurim aguest procès entà saber es sues idees, inquietuds e es besonhs qu’a eth país en un sector d’edat que represente ad aguest collectiu”.

Entara sindica d’Aran, Maria Vergés: “Era joenessa ei part dera nòsta ciutadanetat. Coma responsables publics ei era nòsta obligacion escotar-les e auer-les en compde, perque ara fin son eth futur deth nòste país e an de poder auer veu e vòt entà definir quin territòri vòlen. Aguest procès participau ei ua prumèra via de contacte entà auançar en un procediment util que pòrte as joenes e joeni d’Aran a confiar ena institucion”.

Cau remercar qu’entàs interessadi en respóner es enquèstes, aguestes se trapen enes hilats sociaus deth Conselh Generau d’Aran e ena Oficina de Joenessa, plaçada en Vielha.

Vielha, 30 d’agost 2024.