• Eth Centre Especializat en Tecnificacion Esportiva d’Espòrts d’Iuèrn (CETEI) dera Val d’Aran a dat era gessuda ara naua sason esportiva. Aguesta setmana an començat es entrenaments de tecnificacion infantila, que mèrquen er inici d’un periòde intens de preparacion e aprendissatge entàs joeni esportistes.

Plaçat en un entorn privilegiat, eth CETEI Val d’Aran compde damb era estacion d’esquí de Baqueira-Beret e eth Palai de Gèu coma principaus scenaris d’entrenament, e er IES d’Aran coma centre formatiu. Aguest centre nacionau reconeishut se dedique ara formacion integrau des esportistes, e trabalhe en tres airaus fondamentaus:

• Desvolopament personau e valors umans:entà fomentar eth respècte, er esfòrç, era superacion e eth trabalh en equipa.
• Tecnificacion esportiva:entrenament tecnic e fisic de naut nivèu, tà promòir abituds saludables e milhorar es competéncies esportives.
• Formacion academica:tà garantir qu’es esportistes compaginen era sua trajectòria esportiva damb era educacion academica.

Ath long d’aguesta setmana, es equipes de tecnificacion trabalhen intensaments en diuèrsi espacis dera Val d’Aran, e apliquen programes d’entrenament adaptadi a cada nivèu e disciplina esportiva. Er objectiu ei preparar es esportistes entà qu’artenhen eth sòn maxim rendiment, tant en competicions nacionaus coma internacionaus.

Eth CETEI Val d’Aran ei un referent ena formacion d’esportistes d’iuèrn en tot er Estat, damb ua trajectòria consolidada en espòrts coma er esquí aupin e d’autes disciplines restacades damb era nhèu e era montanha.

Eth conselhèr d’Espòrts deth Conselh Generau d’Aran, Javi Cavero, vò encoratjar as esportistes que formen part deth CETEI: “Des deth Conselh Generau d’Aran, volem animar as joeni e joenes d’aguest centre de tecnificacion entà arténher fòrça exits, en tot que damb eth nòste supòrt vos acompanham ena vòsta evolucion, tant laguens coma dehòra des pistes”. A hijut: “Impulsam er espòrt e desvolopament des nòsti joeni talents”.

Se pòt seguir tota era actualitat deth CETEI Val d’Aran enes hilats sociaus:
👉  Instagram CETEI Val d’Aran

Conselh Generau d’Aran
Impulsam er espòrt e eth desvolopament des nòsti joeni talents.

#TecnificacionEsportiva #EsportsdIuèrn #CETEIValdAran #BaqueiraBeret #ValdAran #FormacionIntegrau #EsportiValors

Vielha, 13 de deseme de 2024