Eth parc de visualizacion de fauna, Aran Park, iniciarà eth dissabte, dia 19 de març, era sua quarta sason.

Eth parc se tròbe en Portilhon, a 6km deth pòble de Bossòst.

Eth conselhèr de Territòri d’Aran, Jose A. Boya, damb eth director e trabalhadors d’Aran Park.

Es Pirenèus e era fauna sauvatja se tròben a compdar deth 2013 en Aran Park, plaçat en ua des vessants deth Pòrt deth Portilhon entre era Val d’Aran e Bagnères de Luchon, eth parc de fauna, cada còp damb major riquesa d’animaus, demore convertir-se entath visitant en un cornèr entà compréner melhor era natura e era fauna que mos entore.

Damb ua superfícia de vint ectares, era visita transcor en un recorregut de 2 ores a on se pòden observar catorze espècies diferentes d’animaus, damb un totau de mès d’un centenat d’animaus, tant de mamifèrs coma d’aus, en semi libertat (ossi, gatilops, isards, marmòtes, lops blanqui, cèrvis,…)

Aran Park aufrís as visitants ua sensacion de proximitat e libertat en tot observar es animaus en sòn pròpi abitat. Atau madeish les permet descorbir e calar-se enes imponents bòsqui qu’auem en territòri.

Aran Park inície era sason eth 19 de març en tot daurir toti es dies enquiar 1 de noveme, de 09:30 a 18:00 ores, e enquiàs 19:00 ores es mesi de junhsèga e agost. Dispause d’un airau de picnic ath cant d’un snack-bar, daurit es dimenjades, hèstius e vacances escolares, en quau s’aufrissen begudes e servici de minjars.

Aran Park arribèc a registrar mès de 42.000 visites en 2015.

Mès informacion: www.aran-park.es

Vielha, 18 de març de 2016

Conselh Generau d’Aran: Núria Sanjuan