Eth Conselh Generau d’Aran, a trauès dera Empresa ALSA, (Next Continental Holding, S.L.U) adjudicatària deth transpòrt regular intèrn dera Val d’Aran, meterà en foncionament, a compdar deth dia 1 de deseme, pantalhes informatives damb informacion addicionau enes marquesines de Les, Vielha e Baqueira.

En totau i auràn 6 pantalhes. Un còp en plen foncionament d’aguestes pantalhes se plaçaràn còdis QR, que permeteràn obtier informacion a trauès des dispositius mobils ara rèsta de marquesines. A compdar deth 2015, se plaçaràn 4 pantalhes mès.

Aguestes melhores an er objectiu de qu’er usatgèr age coneishements deth temps de demora deth pròplèu transpòrt.

Aguesta ei ua accion que s’enquadre laguens dera melhora de qualitat des servicis, tal e coma s’exigic en Plec de Preinscripcion Tecnica deth Concors aprovat peth Govèrn d’Aran

Era empresa d’ALSA (Next Continental Holding, S.L.U), dispause d’un burèu d’atencion ath public, damb orari: Maitin de 09h15 a 13h00 e pera tarde, de 18h00 a 19h00.

En paraules dera conselhèra de Torisme, Comèrç e Consum, Anna Díaz,”a compdar d’aguest mes de gèr enquiara, eth numèro d’usatgèrs deth transpòrt intèrn s’a incrementat un 60,49%”.

“Aguestes donades mos confirmen qu’eth trabalh realizat peth Govèrn d’Aran ena mielhora e racionalizacion deth servici deth transpòrt permet auer ath territòri un servici cabecièr en transpòrt intèrn” a explicat eth sindic d’Aran, Carlos Barrera.