Vielha, 7 de mai de 2018.- Era Val d’Aran tornarà a èster part deth recorregut dera quatau edicion dera Campilaro, que se celebrarà deth 20 ath 22 junhsèga de 2018.

Era rota ciclista que trauèsse eth còr des Pirenèus prepause un traçat totau de 330 quilomètres ath long de tres dies. Campilaro 2018 compdarà damb quate etapes de mieja e nauta montanha, dues d’eres damb arribada e gessuda ena Val d’Aran: en Còth dera Bassa d’Oles (1599m) e en Vielha, respectiuaments.

Bagnères-de-Luchon a estat era escuelhuda entà èster era ciutat de gessuda e d’arribada dera quatau edicion dera Campilaro Pirenèus 2018. Eth recorregut, renauit en un 70%, en còr des vals de l’Haute-Garonne e dera Val d’Aran, se compause de 8 passi principaus: eth Còth des Ares (797m), eth Còth de Mente (1350m), era estacion de Superbagnères (1800m), era estacion de Bourg d’Oueil (1350m), eth Còth deth Portillon (1296m), Còth dera Bassa d’Oles (1599m), eth Pòrt de Balès (1755) e era estacion des Agudes (1560m).

Era rota convide a recórrer legendàries carretères que vederen a passar eth Tour e era Vuelta e a descorbir es lòcs e païsatges excepcionaus qu’amaguen es Pirenèus. Eth recorregut dera Campilaro ei ua circular damb inici e fin en Luchon. Eth dissabte 21 de junhsèga era Campilaro 2018 arribarà ara Val d’Aran en tot entrar peth pòrt deth Portillon entà Bossòst des d’a on se dirigirà enquiara Bassa d’Oles, fin dera tresau etapa. Dimenge 22 era quatau e darrèra etapa ges de Vielha entà tornar enquia a Luchon, fin deth recorregut.

Es inscripcions entara Campilaro 2018 son daurides a toti es ciclistes aficionadi, toristes e corredors damb o sense licéncia a compdar deth 15 de noveme d’er an passat, damb un limit maximau de 198 participaires. S’aufrissen dues modalitats de participacion damb es madeishes prestacions (inscripcion individuau e inscripcion en equipa de cinc ciclistes) e tres paquets de lotjament.