• Pendent era amassada s’an tractat ahèrs relacionadi damb era dificultat entà curbir determinades places de professionaus sanitaris en territòri e es possibles accions entà solucionar aguesta problemática

Aguest maitin era sindica d’Aran, Maria Vergés, s’a amassat damb era secretària generau de Salut dera Generalitat, Mercè Salvat qu’a visitat eth Conselh Generau d’Aran damb ua delegacion deth departament de Salut.

En aguesta trobada ena que tanben an participat es responsables deth Servici Aranés de Benèster e Salut e Aran Salut atau coma representants dera region sanitària deth Naut Pirenèu e deth departament de Salut, s’a tractat sus era problematica ena cobertura de professionaus en territòri d’Aran e deth Pirenèu en generau.

Atau madeish, es representants deth departament de Salut an presentat eth “Plan d’ocupacion de lòcs de dificila cobertura” que preten trobar solucions ad aguesta qüestion que condicione eth foncionament deth sistèma sanitari.

En aguest sens, era sindica d’Aran a manifestat que “laguens deth marc d’autonomia qu’a era Val d’Aran ara ora d’establir es sues aliances estrategiques damb diuèrsi centres sanitaris, coma ei eth cas der Hospital del Mar, mantiem ua comunciacion dirècta e constanta damb eth departament de Salut que, coma ei aguest cas, mos permet trabalhar conjuntament en ua problematica coma aguesta, era dera manca de professionaus de determinades especialitats, que compartim damb era rèsta deth Pirenèu e que condicione fòrça poder aufrir es servicis qu’era ciutadania a de besonh”.

Era sindica d’Aran a volut arregraïr era visita dera secretària generau de Salut damb qui s’an emplaçat, a trauès dera region sanitària, a seguir trabalhant entà coordinar esfòrci e consolidar eth sistèma sanitari aranés.