• Eth Centre de Lauegi hè a servir era intelligéncia artificiau a compdar d’un modèl desvolopat enes Aups soïssi qu’a ua efectivitat deth 70%.

Eth Centre de Lauegi dera Val d’Aran hè a servir, a compdar d’aguest iuèrn, un nau modèl de prediccion basat ena intelligéncia artificiau. Aguesta airina trabalhe damb algoritmes que tracten dades meteorologiques e deth celh nivau que permeten hèr ua prediccion deth perilh de lauegi objectiva e de nauta resolucion.

Aguest nau sistèma s’a desvolopat en Soïssa e s’a verificat damb dades de 20 ans de bulletins “umans” entà arténher un rendiment deth 70%, similar ath pròpi encèrt e error d’aguesti, basat ena recuelhuda de dades des bulletins de lauegi e enes observacions dirèctes, qu’apròpen era intelligéncia artificiau ath critèri des especialistes ena matèria.

Es condicions meteorologiques similares, pr’amor qu’eth celh de nhèu ei similar en Aran e en Soïssa, hèn possibla era adaptacion d’aguest sistèma d’IA en territòri.

Entà Montse Bacardit, especialista deth Centre de Lauegi deth Conselh Generau d’Aran: “Aguesti instruments, basadi ena intelligéncia artificiau e ena estadistica, s’alimenten des dades des estacions automatiques, en nòste cas: Comalada e Sassèuva, e tanben deth modèl deth celh de nhèu Snowpack, que ja hè quauqui ans qu’auem implementat, entà simular en Nowcast (moment actuau) e Forecast (futur) paramètres qu’enquiath moment s’estimen damb critèri d’expèrt”.

Era investigacion scientifica, en aguest cas a trauès dera intelligéncia artificiau, e gràcies ara solida experiéncia des tecnics deth Centre de Lauegi d’Aran, permet ua mielhora dera qualitat des prediccions de lauegi que se publiquen diàriaments enes bulletins publics entà toti es usatgèrs dera montanha iuernau.

Vielha, 13 de  hereuèr de 2025