Eth Govèrn aranés, peth miei deth Departament d’Agricultura, Ramaderia e Medi Naturau, a organizat ua jornada sus era recuperacion dera fruta de montanha. Aguesta jornada, que compde damb eth supòrt deth Departament d’Agricultura, Ramaderia, Pesca, Alimentacion e Medi Natural dera Generalitat de Catalunya, se centre en prètzhèt dera recuperacion e es potencialitats de naui productes emergents ath torn des varietats locaus de fruta ena Val d’Aran.

Era jornada a compdat damb era preséncia deth sindic d’Aran, Carlos Barrera, deth conselhèr d’Agricultura, Ramaderia e Medi Ambient d’Aran, Jose E. Arró, e deth director generau d’Agricultura e Ramaderia deth DAAM, Miquel Molins.

En paraules deth conselhèr Jose E. Arró, “era jornada a coma objectiu establir un dialòg entre es responsables des projèctes e possibilitar era dinamizacion conjunta des experiéncies ena Val d’Aran”.

Pendent era jornada s’an presentat prospeccions de pomèrs hètes en Aran, eth projècte: Fructicultura de montanha, a cargue deth Dr. Ignasi Iglesias, responsable deth programa d’avaluacion de naues varietats de IRTA.

A mès, era cinquantea d’assitents an degustat productes elaboradi damb poma deth restaurant Era Mòla e de sidra e chuc d’Aran de Terra.