• Damb er objectiu d’aufrir ua melhor atencion as usatgèrs e usatgères des nòsti Servicis Assistenciaus Integrats, eth govèrn d’Aran a renauit un totau de 25 lhets en servici d’espitalizacion e ena sala de dilatacion deth blòc obstetric der Espitau, en tot cambiar-les per un nau modèl de darrèra generacion e damb ua tecnologia innovadora entà arténher ua major comoditat e seguretat autant entàs pacients coma entàs professionaus

Eth Conselh Generau d’Aran a renauit per un nau modèl de darrèra generacion un totau de 25 lhets der Espitau Val d’Aran, plaçadi en servici d’espitalizacion e ena sala de dilatacion deth blòc obstetric.

“Deth govèrn d’Aran ençà trabalham entà melhorar era atencion as persones que se balhe enes nòsti Servicis Assistenciaus Integrats” asseguraue era sindica d’Aran, Maria Vergés, en tot híger que: “damb eth renauiment d’aguest equipament, que supause ua melhora significativa des nòstes installacions, volem arténher ua major comoditat e seguretat autant entàs pacients coma entàs professionaus deth nòste Espitau”.

Aguest nau modèl de lhets compde damb ua tecnologia innovadora qu’ajude as professionaus a proporcionar ua atencion de grana qualitat as pacients, en tot facilitar ua mobilizacion mès senzilla, ua desinfeccion e neteja simplificades, e ua manobrabilitat melhorada.