• Era sindica d’Aran a inaugurat aguest maitin aguesta intervencion amiada a tèrme a trauès der airau de patrimòni deth Conselh Generau d’Aran e qu’a trèt ara lum ua part des pintures d’aguesta glèisa que se relacionen damb es dejà existentes ena glèisa de Santa Eulària d’Unha.

Era sindica d’Aran, Maria Vergés, amassa damb eth conselhèr de torisme e promocion economica, Josep Canut, a presentat aué era descubèrta des pintures muraus dera glèisa de Sant Julian de Garòs, qu’an vist era lum dempús des trabalhs amiadi a tèrme laguens deth programa d’intervencion en patrimòni dera maxima institucion aranesa.

Er acte inaugurau s’a hèt a coïncidir damb era hèsta locau de Sant Ròc, a on Elisa Ros, expèrta en patrimòni, a explicat as assistents es detalhs d’aguesta descubèrta, que la relacionen damb es mèstres que s’atribuíssen as pintures dera glèisa d’Unha.

Es trebalhs de descaperament e restauracion des pintures muraus s’encetauen hè un mes, dempús d’auer estat localizades ena paret nòrd dera glèisa romanica, uns trabalhs realizadi pes restauradores dera empresa TdArt Heritage Curators, e qu’an auut un còst de 18.077,40 euros.  Aguesta intervencion a estat  promoiguda peth Conselh Generau d’Aran, e ei part des accions previstes en 2024 laguens deth convèni de finançament qu’a tamb era Deputacion de Lhèida entara restauracion de bens deth patrimòni culturau d’Aran.

“Era descubèrta d’aguestes pintures ei un exemple mès deth nivèu deth patrimòni aranés e dera sua qualitat qu’evidéncie qu’era Val d’Aran a un gran potenciau en aguest encastre” declaraue era sindica d’Aran, que higie que “era apòsta deth govèrn d’Aran pera preservacion der auviatge culturau e patrimoniau aranés ei clara e fèrma, e ei per aquerò qu’aguesta intervencion en Garòs ei ua prumèra fasa de d’autes que n’an de seguir entà acabar de descurbir era rèsta des pintures presentes en aguesta glèisa”.

Era glèisa de Sant Julian de Garòs ja possedís un important conjunt de pintura murau deth sègle XVI que decòre es vòutes dera absida, e que damb es actuaus trabalhs ena paret nòrd, se ve incrementat.

En aguest sens, era intervencion a constatat era existéncia de pintura murau dejós des coches de caudia e plastre que curbissen era paret meridionau dera glèisa de Sant Julian de Garòs, que se sajaràn de descaperar e restaurar en pròplèus actuacions.

Vielha, 16 d’agost 2024