• Eth sindic d’Aran, Francés Boya, e era vicesindica prumèra, Maria Vergés, an mantengut aguest maitin ua amassada damb era conselhèra de Cultura dera Generalitat de Catalunya, Mariàngela Vilallonga, ara que s’a hijut dempús tanben era directora de Politica Lingüistica, Esther Franquesa, entà tractar ahèrs relacionadi damb era lengua e cultura araneses

Era Val d’Aran patís des de hèr fòrça ans un deficit fòrça important en çò que hè as infraestructures culturaus en comparacion damb d’auti territòris vesins. Eth govèrn deth Conselh Generau d’Aran considère primordiau poder desvolopar politiques culturaus que, per un costat dinamizen era cultura en Aran e balhen supòrt as entitats sociaus que se dediquen ad aguest prètzhèt e, per aute, qu’aguestes accions en matèria de cultura servisquen tanben coma motor e supòrt ara perviuença e normalizacion der aranés.

Ei pr’amor d’açò qu’aguest maitin eth sindic d’Aran, Francés Boya, e era vicesindica prumèra, Maria Vergés, s’an amassat damb era conselhèra de Cultura dera Generalitat de Catalunya, Mariàngela Vilallonga, ara que s’a hijut dempús tanben era directora de Politica Lingüistica, Esther Franquesa, entà tractar ahèrs relacionadi damb era lengua e cultura araneses.

Pendent era amassada eth sindic a tractat damb era conselhèra eth besonh d’establir un marc de relacion entà fixar eth supòrt dera Generalitat en matèria d’inversions culturaus tà equiparar Aran damb er estandard culturau deth territòri.

Atau madeish, eth sindic a trasladat autant ara conselhèra coma ara directora de politiques lingüístiques eth besonh d’establir ua relacion floida e coordinada en matèria de politica lingüistica pr’amor d’evitar era dispersion enes accions e era confusion en matèria lingüística atau com guanhar en eficacia tà preservar era lengua e milhorar er estat der aranés.

“Tath govèrn deth Conselh Generau d’Aran era qüestion lingüistica ei un ahèr clau pr’amor que sense era lengua non existirien ne era singularitat aranesa ne eth nòste autogovèrn” afirme eth sindic d’Aran, que hig que “eth Conselh Generau a d’èster er epicentre des politiques lingüistiques e a d’auer era competéncia en aguesta matèria, mes enlà de que totes ajudes e, en especiau es dera Generalitat, seràn benvengudes”

Andús govèrns s’an emplaçat a convocar enes pròplèus setmanes un Conselh de Politica Lingüistica der Occitan Aranés entà tractar a hons toti aguesti ahèrs.