• A compdar deth 19 de març se daurís era sason de pesca en territòri.

Eth Conselh Generau d’Aran a publicat dejà er edicte que da per dubèrta era sason de pesca 2025 ena Val d’Aran a compdar deth 19 de març, enes aigües de saumonids (trueita comuna) de baisha montanha. En nauta montanha començarà a compdar der 1 de mai e enes lacs a compdar der 1 de junh.

Era pesca ei permetuda enes trams abilitats ad aguest efècte, d’acòrd damb er Edicte publicat entara tempsada 2025  e que se poirà consultar enes huelhetons editats peth Conselh Generau d’Aran.

Eth nombre maxim de captures autorizades per pescador e dia se manten e ei proporcionau ara densitat de trueita actuau. En referéncia as mesures de captura, se manten eth critèri d’establir ua talha maxima de trueita (mesura a partir dera quau cau retornar eth peish tar arriu), era finalitat ei preservar era fraccion d’edats reproductores enes nòsti arrius.

Es captures se regulen  dera manèra següenta:

Arriu Garona: 6 captures/pescador e dia.

Bassa d’Aiguamòg e d’auti arrius: 8 captures/pescador e dia.

Lacs e arrius entre lacs: 12 captures/pescador e dia.

Se permet era captura d’espècies alloctònes sense limit de talha o quòta de captura deth vairon (Phoxinus sp.), deth salvelin o trueita aupina (Salvelinus umbla) e dera trueita irisada (Oncorhynchus mykiss) e se proïbís er usatge de sòles de feutre entà evitar era propagacion d’espècies exotiques.

Se poiràn expedir es licéncies de pesca valables entara Val d’Aran e era rèsta de Catalunya, e tanben es permisi diaris especifics tà cada zòna de pesca controtlada trauès dera plana web dera airau de Miei Ambient deth Conselh Generau d’Aran.