• Era sedença deth Conselh Generau acuelherà era trobada, organizada peth Consòrci Leader Pirenèu Occidentau

Dimars que ven, 21 de gèr, entàs 12.30 ores, eth Conselh Generau d’Aran acuelherà era session informativa sus es ajudes “Tiquet Rural”, organizada peth Consòrci Leader Pirenèu Occidentau.

Es ajudes “Tiquet Rural” consistissen en autrejament d’enquia 35.000 èuros entara creacion de naues empreses o era aquisicion d’empreses en traspàs. Er impòrt economic que se receberà non ei restacat ara realizacion de cap d’inversion. Ath delà, era subvencion ei compatibla damb es convocatòries d’ajudes Leader restacades a projèctes d’inversion.

Er objectiu d’aguestes ajudes ei fomentar era activitat economica en zònes ruraus, damb accions restacades damb era creacion d’aucupacion e reactivacion economica, e se’n pòden beneficiar es persones fisiques, es persones juridiques e es cooperatives non agràries.

Aguesta session informativa tanben se poirà seguir online a trauès deth ligam: bit.ly/42cXJs0

Aguestes subvencions, prebotjades peth Departament d’Agricultura, Ramaderia, Pesca e Alimentacion dera Generalitat de Catalonha, se poiràn demanar enquiath 14 de hereuèr d’aguest 2025 a trauès d’Internet.

Podetz consultar es bases d’aguestes ajudes en aguest ligam: https://www.leaderpirineuoccidental.cat/tiquet-rural-2024-2/

Vielha, 17 de gèr 2025