Vielha, 17 de març de 2017.- A compdar deth dia 13 d’hereuèr e enquia acabar era sason d’esquí, en tot coïncidir damb Setmana Santa, eth Servici de Gestion de Residus dera Val d’Aran desvolòpe ua campanha de recuelhuda pòrta per pòrta des grani productors de fraccion organica des zònes de Naut Aran e de Vielha e Mijaran.

Eth servici se preste cinc dies ara setmana, de deluns a diuendres damb era participacion iniciau d’ua vintia d’otèls e restaurants de Naut Aran e Vielha, que s’a anat en tot incrementar damb era participacion de mès establiments interessadi en incorporar-se ara campanha de recuelhuda selectiua dera fraccion organica des sòns residus municipaus.
Ath long des pòques setmanes d’implantacion deth servici, s’an arrecuelhut mès de 5 tones setmanaus de fraccion organica de bona qualitat.

Era campanha s’alongarà enquia Setmana Santa, quan acabarà era sason d’esquí

Eth succès d’aguesta campanha non auesse estat possible sense er interès e bona collaboracion des grani productors deth sector toristic que s’i an aderit, a assegurat eth conselhèr de Territòri deth Govèrn d’Aran, Jose Antonio Boya, qu’a volut animar ara rèsta d’empresaris deth sector a participar enes futures campanhes.
Aguestes accions singulares de sensibilizacion mieiambientau permeten ara Val d’Aran auançar entà un nau modèl de desvolopament toristic basat enes principis dera sostenibilitat, era diuersitat culturau e era responsabilitat sociau, era quau causa contribuís ath hèt qu’era Val d’Aran sigue ua destinacion toristica basada en respècte ara cultura, ath miei ambient e ara responsabilitat, atau coma acredite eth certificat Biosphere.

Es accions amiades a tèrme pendent era campanha an estat possibles mercés ara estreta collaboracion dera l’Agència de Residus de Catalunya deth Departament de Territori i Sostenibilitat de la Generalitat de Catalunya e eth Conselh Generau d’Aran a trauèrs des subvencions TES/1770/2016 de foment dera recuelhuda selectiva dera fraccion organica des residus municipaus.

Hotels e restaurants collaboradors:

Hotel Val de Neu, Hotel Himalaya, Hotel Tuc Blanc, Hotel Melià Royal Tanau, Chalet Bacive, Hotel Tuca, Urtau, Hotel Tredos , Rosta, Hotel Melià, Hotel La Creu, Rafael Hoteles, Auberja Era Garona, Hotel Orri, Refugi Santaló, AC Hoteles, Hotel Hipic, Era Còquela, Era Lucana.