Eth passat mes d’octobre eth Conselh Generau d’Aran e era Entidad Ecoembalajes España S.A. (ECOEMBES), signèren un convèni entà méter en marcha un projècte entà melhorar era recuelhuda selectiva d’envasi leugèrs ena Val d’Aran, mejançant eth foment dera participacion d’establiments deth sector ORECA (Ostalaria, Restauracion e Catering).

Es accions que se preven realizar coma s’acordèc en convèni se resumissen en:

– Aumentar era dotacion de contienedors plaçadi ena via publica entara recuelhuda selectiva d’envasi leugèrs adaptadi a un usatge compartit entre eth ciutadan e es generadors singulars. En tot sajar de facilitar era gestion de grani volums as usatgèrs deth sector dera ostalaria.

– Liurament as establiments participaires en projècte de contienedors entà poder-les plaçar en interior des sòns establiments.

– Aufrir informacion e formacion ath personau des establiments entà assegurar era sua participacion activa e corrècta ena recuelhuda.

Ena aplicacion d’aguest convèni, personau acreditat peth Conselh Generau d’Aran e ECOEMBES visitarà bars, otèls e restaurants de tota era Val d’Aran, damb er objectiu de demanar era sua implicacion ena separacion e recuelhuda selectiva des residus que genèren.

En 2017 er accent se meterà enes envasi leugèrs dera madeisha manèra qu’en an anterior se hec en veire.

Aguestes visites son laguens des accions que s’amien a tèrme entara melhora dera gestion des residus ena Val d’Aran.

En paraules deth conselhèr de Territòri d’Aran, Jose Antonio Boya: “Çò que mos interèsse ei obtier ua major conscienciacion dera importància qu’a, tant ambientau coma economica, trabalhar amassa entà ua separacion maximala des residus que se genèren en nòste territòri”.

Vielha, 9 de gèr de 2017

Conselh Generau d’Aran: Núria Sanjuan