• Pr’amor dera commemoracion dera Hèsta d’Aran eth 17 de junh, eth govèrn d’Aran a organizat tad aguesta setmana ua seguida d’actes culturaus e de léser, laguens de “TerSon. Eth son dera tèrra”, er hestau dera cultura d’Aran.
• Damb aguesta programacion culturau eth govèrn aranés vò apropar ara ciutadania era celebracion dera Hèsta d’Aran damb un caractèr mès popular e de léser.

Eth govèrn d’Aran a premanit entad aguesta setmana ua sèria d’actes entà hestejar era Hèsta d’Aran, en tot commemorar era recuperacion dera maxima institucion aranesa hè dejà trenta tres ans.

Tara sindica d’Aran, Maria Vergés: “era volontat deth govèrn d’Aran ei popularizar ua commemoracion que, ath delà d’institucionau, represente era Hèsta de toti es aranesi e araneses, agen neishut o non ena Val d’Aran, e apropar tanben atau activitats culturaus e populars a tota era ciutadania”.

Era programacion d’aguesti dies serà:

Enquiath 15 de junh, teatre musicau damb” Gran Hotel Arania”, de Miguel Pineda, ena sala Era Audiovisuau de Vielha entàs 19:30 ores  enquiath diuendres 14 de junh e tàs 18:00 ores eth dissabte 15 de junh.

Dijaus, 13 de junh tàs 18:00 ores, presentacion deth libre “Eth Quadèrn dera Querimònia” der Archiu Generau d’Aran e inauguracion dera exposicion “Colleccion de fotografies estereoscpiques 3D”, ena Casa deth Senhor d’Arròs.

Deth 14 ath 17 de junh,  teatre deth grop “Era Cabana”, damb era òbra “Èm de pòble! E qué?”, de Manuela Ané, ena sala d’actes der Ajuntament de Les, en oraris deth 14 ath 16 de junh tàs 22:00 ores  e eth 17 de junh tàs 19:00 ores.

Diuendres, 14  de junh tàs 17:30 ores, serada de liurament des Prèmis literaris Mn.Condò, Aran de Literatura e concors de Cuertmetratge en aranés, ena Glèisa de Mijaran.

Tara dimenjada, dissabte tàs 10:00 ores deth maitin i aurà ua rota guidada pes pòbles de Pujòlo damb Ricard Novell, per auança en; sindicatura@aran.org.

Tàs 11:30 ores Activitat entara mainadèra “1,2,3…2,1 La pares tu” ena plaça d’Aran. Pera tarde, tàs 19:30 concèrt cargue deth grop de folk aragonés “La Ronda de Boltaña”, ena Plaça d’Aran.

Tà dimenge, 16 de junh, tàs 11:00 ores, rota guidada entara “Descubèrta des nòsti audèths“ damb Sara Arjó, inscripcions en: sindicatura@aran.org.  Entara mainadèra “Talhèr Art Faig”, ena Plaça d’Aran. Ua jornada que se barrarà damb  un concèrt des grops de musica en aranés “Sarabat” e “Rambalh” ena madeisha plaça d’Aran.

Deluns 17 de junh, dia dera Hèsta d’Aran:

• tàs 11:00 ores, Recepcion d’autoritats e convidats per part dera sindica d’Aran ena sedença deth Conselh Generau d’Aran,
• tàs 11:30 ores, desfilada de pendons de cada terçon enquiara Glèisa de Mijaran.
• tàs 12.00 ores, acte institucionau e autrejament deth Prèmi 17 de Junh. Tot seguit dances tradicionaus araneses damb es còlhes d’Aran.
• Tàs 17.30o ores, espectacle familiau“Salta, canta i balla”, damb chicolatada ena Plaça d’Aran.
• Tàs 19’00 ores, concèrt de musica occitana damb eth grop “Parpalhon” ena Plaça d’Aran.

Vielha, 13 de junh 2024