Vielha, 29 de març de 2019.- Manuel Genswein considerat era maximala autoritat internacionau de rescat en lauegi, aufric ua charrada ena Sala d’Actes deth Conselh Generau d’Aran laguens es activitats programades peth Centre de Prediccion de Lauegi deth Conselh Generau en cors auançat entà formadors sus rescat en lauegi que se celèbre aguesti dies en collaboracion damb Baqueira Beret.

Era charrada acabèc en tot convertir-se en ua classa magistrau impartida per Genswein as assistents, quauqui uns d’eri participaires deth cors, donques qu’aufric tota sòrta de detalhs enes desparières tecniques de recèrca e rescat de companh en cas de laueg.

Manuel Genswein collabòre damb equipes de rescat europèus e americans ath delà d’èster un des especialistes en rescat ena CISA-IKAR organisme internacionau de referéncia e desvolopador deth sistèma de paleo de “cinta transportadora en V” qu’a estat adaptat pera majoria de grops de rescat e centres de formacion.

Eth cors de rescat en lauegi contunharà enquiath dissabte en qu’aurà lòc era practica de rescat en lauegi ena Bonaigua de 10:00 a 13:00 ores. Era practica ei gratuïta mès entà participar ei de besonh inscriuer-se prèviaments en tot enviar un mail a lauegi@aran.org.