Eth passat 9 de seteme, eth Conselh Generau d’Aran se hec resson dera preocupacion des vesins dera Val d’Aran qu’ENDESA, principau empresa de subministrament electric en territòri, non auie facturat eth consum electric des particulars des prumèrs mèsi der an.

Des de Sindicatura deth Conselh Generau d’Aran, s’envièc un escrit a ENDESA en tot demanar explicacions d’aguesta circonstància. Eth passat dia 5 d’octobre s’arrecebec responsa per part d’ENDESA en tot justificar es causes d’aguest retard ena facturacion e qu’en resum ditz:

– Des der 1 de gèr de 2015 i a ua naua nòrma estatau qu’afècte a toti es clients qu’an concessions, e es residents dera Val d’Aran hèn part d’aguest segment. Des d’Endesa s’a elaborat eth procediment mès idonèu entà dar forma as naues factures, d’ací eth retard en sòn enviament.

Endesa tanben a manifestat en escrit deth sindic d’Aran, “qu’es clients non s’an de preocupar pr’amor qu’es factures que se les enviarà des mesi en qué non s’a facturat, s’ajornaràn degudaments entà facilitar-ne eth sòn pagament damb eth madeish termini eth qué Endesa a trigat en enviar-les era factura e segons eth periòde de facturacion abituau deth sòn contracte de subministrament (bimestral o mensuau) e enes madeishes condicions de pagament qu’a actuauments.”

“Es pròplèus dies, es clients dera Val d’Aran arreceberàn ua carta a on Endesa informarà dera reprenuda dera sua facturacion, atau coma er aplaçament des madeishes e es canaus d’atencion a on pòden adreçar-se entà esclarir quinsevolh dobte” a manifestat eth sindic d’Aran, Carlos Barrera.