Vielha, 21 de juriòl de 2017.- A compdar de deman dia 22 de juriòl e enquiath 11 de seteme eth Conselh Generau d’Aran comence eth servici deth Tren toristic d’accès ara ribèra dera Artiga de Lin.

Dempús dera pròva pilòt der an passat entara melhora der accès motorizat ena Artiga de Lin (era pista que junh era poblacion d’Es Bòrdes e eth Plan dera Artiga) damb era regulacion d’accès motorizat en un des paratges mès emblematics e concorrudi pendent er ostiu ena Val d’Aran, que transportèc 21.700 persones pendent er ostiu passat e evitèc qu’uns 8.500 veïculs passèssen per aguest tram de pista, eth Conselh Generau d’Aran comence definitiuaments aguest servici toristic.

Enguan des deth Conselh tanben s’a abilitat un camin entà totes aqueres persones que volguen accedir ara ribèra deth Joèu en tot caminar per laguens deth bòsc.

Era regulacion der accès motorizat ara Ribèra deth Joèu compòrte qu’es darrèri 3 km dera pista dera Artiga de Lin, siguen reguladi. Es veïculs que non dispòsen d’autorizacion d’accès motorizat, auràn d’estacionar ena zòna d’estada plaçada just abans dera ermita dera Vèrge dera Artiga de Lin, un espaci a on ei installada ua caseta d’informacion entàs visitants, que tanben disposaràn d’un huelheton d’informacion complementària damb era descripcion dera Artiga de Lin, recomanacions, contacte de guides e rotes. Aguest ei eth punt de gessuda e arribada deth tren.

Er orari de regulacion serà des 9 ores deth maitin enquias 18 ores. Es taxis deth país auràn liure accès ena Artiga de Lin, atau coma eth rèste de vesins e vesies dera Val d’Aran que paguen er impòst de circulacion des sòns veïculs enes ajuntaments dera Val d’Aran.

Enguan s’a incrementat era frequéncia deth tren entà sajar evitar que se formen coes enes ores centraus deth dia. Eth prètz deth servici serà de 2 èuros per viatge en cas des adults e d’un èuro entà mainatges d’edats comprenudes entre es 3 e es 12 ans. Entàs menors de 3 ans eth trajècte ei gratuït.

Era regulacion der accès motorizat ena Ribèra deth Joèu s’includís laguens deth plan deth Conselh Generau d’Aran qu’incorpòre era reforma e ampliacion deth refugi dera Artiga de Lin entà potenciar aguest lòc unic ena Val d’Aran e dar a conéisher era rota aranesa der Aneto, qu’eth Govèrn d’Aran ja a hèt d’autes accions, coma ei era installacion est an passat d’un cable d’acièr pera part deth Còth deth Hòro , en tot melhorar es camins tradicionaus deth pas entà Benasque atau coma eth futur projècte de Centre d’Interpretacion de Natura.