Comence a foncionar provisionauments era prumèra fasa deth nau centre de recuelhuda de residus de Bèusa

Vielha, 4 de junh de 2018.- Aué deluns a entrat en foncionament provisionau era prumèra fasa deth nau centre de recuelhuda de residus de Bèusa en Vielha e Mijaran.

Era posada progressiua d’aguest nau equipament significarà ua melhora fòrça importanta dera gestion ambientau e facilitarà encara mès era collaboracion ciutadana ena gestion sostenible deth miei ambient.

Era naua installacion ei bastida sus ua parcèla d’uns 4.200 m2 cedida pera ACA (Agéncia Catalana dera Aigua) ath Conselh Generau d’Aran entara adeqüacion dera installacion deth centre de recuelhuda que que sofric eth damatge pendent es inondacions de 2013.

Eth bastiment deth centre de recuelhuda se realize en dues fases. Era prumèra fasa de bastiment d’aguest nau equipament a agut un pressupòst de 295.438,65 €, qu’era Agéncia de Residus de Catalonha n’apòrte 250.000 €. Eth nau centre de recuelhuda se començarà damb 7 des 14 departaments que ne disposarà er equipament un còp s’age completat era dusau fasa de bastiment. Eth Conselh Generau d’Aran a previst executar lèu aguesta dusau fasa que ja compde damb eth finançament dera Agéncia de Residus de Catalonha e deth sistèma integrat de gestion Ecoembes. Un còp finalizades es òbres, aguest nau equipament permeterà optimizar era gestion deth servici de recuelhuda selectiva de residus municipaus en tota era Val d’Aran. Aguesta dusau fasa ei pressupostada en 597.943 €.

Eth nau centre de recuelhuda de residus, s’installe en un recinte barrat qu’a ua bascula ena entrada a on s’arreceberà as usatgèrs que pujaràn per ua rampa ath departament des diuèrses caishes de residus generadi, degudaments senhalizades, e, un còp depausat es residus ena caisha corresponenta, er usatgèr contunharà entà baishar per ua dusau rampa abilitada ath finau deth departament e tornarà ara bascula de recepcion a on un operari li liurarà eth corresponent albaran d’entrada damb descripcion des caracteristiques des materiaus depausadi en centre de recuelhuda, tipe de residu, quantitat, data, ora, pes, eca. Es usatgèrs non particulars abonaràn es tarifes aprovades per ua naua ordenança reguladora der emplec des centres de recuelhuda de residus aprovadi peth Conselh Generau d’Aran.

En ua visita realizada aué ath nau equipament, eth sindic d’Aran, Carlos Barrera, expliquèc qu’actuauments i a bastit quasi eth 50% dera installacion, encara que manque ua bastissa a on se plaçarà tota era maquinària de trituracion e que pense qu’era totalitat dera madeisha entrarà en foncionament en mes de seteme d’enguan. Era naua recuelhuda segontes eth sindic d’Aran, daurís un nau modèl de gestion e racionalizacion des residus ena Val d’Aran. Barrera, se hec referéncia tanben a que, damb era entrada en foncionament deth centre, quan aguest foncionarà a plen rendiment, eth Govèrn d’Aran redusirà en 60% eth còst economic dera gestion des residus, qu’ara madeish ei de 180.000 € annaus.

Es desparièrs residus gestionadi en centre son enviadi as gestors omologadi corresponenti, ja sigue damb era madeisha caisha a on se depause eth residu, o en gàbies abilitades entath transpòrt segontes era natura deth producte.

S’estime qu’eth nombre de caishes de 30m3 que gessen mensulaments dera recuelhuda oscille entre 40 e 50. Quan era dusau fasa sigue finalizada era installacion serà premanida entà compactar es materiaus des fraccions qu’atau ac permeteràn, coma per exemple eth carton e husta, damb er objectiu d’optimizar eth servici en tot redusir eth nombre de viatges e eth còst qu’açò represente entath Conselh Generau d’Aran e entàs ciutadans.

Actuauments era Val d’Aran dempús des esfòrci deth Govèrn d’Aran, e damb era collaboracion des grani productors de residus e dera ciutadania aranesa, ei eth 11au territòri de Catalonha a on mès residus se reciclen a trauès dera recuelhuda selectiva.

Er increment progressiu e era conseqüent melhora des percentatges demòstre er aument dera concienciacion ciutadana sus era importància dera preservacion deth miei ambient.

Eth conselhèr de Territòri d’Aran, José A. Boya, e eth conselhèr de Planificacion Territoriau e Naua Tecnologies e Innovacion, Cesar Ruíz Canela, atau coma eth Tecnic de Gestion de Residus deth Conselh Generau d’Aran, Josep Mª Insausti, tanben an participat ena visita.

Es oraris des punts nets ena Val d’Aran son:

Bèusa Vielha e Mijaran

Deluns: maitin de 08:30 a 13: 00 ores. Tarde barrat.
De dimars a diuendres: maitin de 08:30 a 13: 00 ores. Tarde de 15:00 a 18: 00 ores
Dissabte: maitin de 10:00 a 13: 00 ores

Gessa Naut Aran barrada des de deman 5 de junh.

Tarter De Margalida Bossòst