Vielha, 19 de gèr de 2018.- Eth Conselh Generau d’Aran a començat aguesta setmana es trabalhs d’elaboracion der estudi qu’amien a tèrme tecnics dera Direccion Generau de Qualitat Ambientau e Cambi Climatic dera Generalitat de Catalonha, sus era contaminacion acostica ena N-230 ath sòn pas per Aran.

Aguest estudi arrespon coma anoncièc eth sindic d’Aran, Carlos Barrera, a que jornalièraments circulen per aguesta carretèra uns 600 veïculs de transpòrt pesat. Actuauments eth trafic de camions pera N-230 ei restringit pes òbres que se hèn ena carretèra N-125 (RD44) en França ath sòn pas pera poblacion de Saint Béat.

Eth sindic d’Aran, expliquèc qu’er estudi se harà en dues fases, era prumèra sense trafic de camions e era dusau damb eth trafic de dies abituaus.

Entà amiar a tèrme es medicions s’a installat un sonometre de medicion acostica ara nautor d’Aubèrt ena N-230. Ua accion que hè part der Estudi Mieiambientau que realize eth Conselh Generau d’Aran, entà analisar era emission de gasi e era contaminacion acostica dera carretèra.

Es resultats dera prumèra medicion se compararàn damb ua dusau que se realizarà quan eth trafic de camions ena N-230 serà restablit en Saint Béat. Cap arrebrembar qu’eth trafic des veïculs de mès de 8,5m de longitud ei interromput en aguesta poblacion francesa des deth dia 14 de deseme de 2017 enquia miejans de hereuèr d’enguan.