• Eth Conselh Generau e, FCC, era empresa adjudicatària deth servici de remassada e tractament de lordères, impulsen ua campanha informativa deth nau servici entàs grani productors. 

• Segontes es previsions dera empresa, eth servici de pòrta a pòrta entà grani productors serà eth prumèr que s’amiarà a tèrme e s’iniciarà a compdar deth 3 de març.

Aué s’inicie era campanha informativa adreçada a grani productors per çò que hè ath servici de remassada de residus damb eth nau modèl pòrta a pòrta.

Dies endarrèr se hec a arribar a otelèrs, restauradors, granes superfícies e comèrci, ua carta a on se les explicaue er inici un torn de visites as sòns establiments tà explicar in situ aguest nau servici, que s’implemente a compdar d’aué, damb visites a cargue d’educadors ambientaus que s’encuedaràn d’explicar eth procès d’aguest nau sistèma de remassada.

Eth nau modèl de remassada qu’impulse eth Conselh Generau d’Aran, s’implementarà de manèra progressiva e començarà damb es grani productors a compdar deth 3 de març. Aguest modèl a de perméter redusir eth volum dera rèsta e aumentar atau eth reciclatge entà arténher es donades qu’Euròpa exigís en matèria de sostenibilitat, entà mès entà deuant implementar-lo a tota era rèsta dera ciutadania.

Eth conselhèr de Gestion Ambientau e Transicion Energetica, Oriol Sala declaraue que “aguesta campanha vò dar tanben respòsta as dubtes qu’es diuèrsi sectors economics des consideradi grani productors per çò que hè ad aguest nau sistèma, un sistèma que preten arténher ua optimizacion dera remassada de lordères, qu’a de passar deth 24% actuau ath 50%”. Eth conselhèr Sala higie: “Auem eth compromés de hèr ua Val d’Aran mès neta e sostenibla damb un cambi de besonh entà alinhar-mos damb es naues normatives ambientaus mercades pera Union Europèa”.

Vielha, 14 de gèr 2025