Comence era setmana Jaquetti, un aumenatge a ua hemna polifacetica qu’auec un fòrt ligam damb era Val d’Aran

Pendent eth dimars e eth diuendres d’aguesta setmana, eth Musèu dera Val d’Aran a organizat un seguit d’actes e activitats en Ecomusèu çò de Joanchiquet entà visibilizar era figura de Palmira Jaquetti, ua hemna de gran talent en camps coma era poesia, era musica o era lengua, entre d’auti, e qu’establic era sua dusau residéncia en Aran, interessada pera nòsta lengua, era nòsta cultura e era nòsta gent

Eth Musèu dera Val d’Aran organize ues jornades culturaus damb motiu dera exposicion itineranta “Lum ena amna. Palmira Jaquetti 1895-1963”, expausada en Ecomusèu çò de Joanchiquet de Vilamòs enquiath 6 de seteme de 2021.

A compdar de deman, dimars 17, enquia diuendres 20 d’agost er Ecomusèu compdarà cada dia damb activitats que aproparan as visitaires ara figura de Palmira Jaquetti.

Palmira Jaquetti (Barcelona 1895-Els Monjos 1963) siguec ua hemna damb un gran talent en diuersi camps: poesia, musica, lengua, recèrca etnografica, botanica, etc.

Docenta de profession, tanben compilèc 10.000 cançons entara obra deth Cançoner Popular de Catalunya, mission que la portèc a descorbir era Val d’Aran en 1925. A compdar d’alavetz, s’interessèc pera lengua, cultura e gent dera Val e, en 1940, passèc a auer era sua dusau residéncia en Aran, prumèr en Salardú (1940-1944) e dempús en Arties (1944-1962).

Eth sòn legat culturau, encara en fasa de recèrca, mos apròpe ara Val d’Aran de hè lèu 100 ans. Gràcies ada era, coneishem es cançons que se cantauen, era manèra de víuer dera gent, era sua forma de parlar e inclús es toponims que s’emplegauen.

Totes aguestes qüestions ath torn dera vida, òbra e talent de Palmira se poiran conéisher pendent aguesti dies.

Dimars 17 entàs 19:00 ores, Carme Oriol Carazo (catedratica de Filologia Catalana de la Universitat Rovira i Virgili) e Comissària der An Palmira Jaquetti, inaugurarà es jornades damb ua conferéncia inedita sus Palmira Jaquetti e era Val d’Aran.

Dimèrcles 18 entàs 11:00 ores, compdaram damb Josefina Roma i Riu, professora titular dera Universitat de Barcelona, jubilada aunorifica en Antropologia, que parlarà sus era espiritualitat enes memòries de Palmira Jaquetti.

Dijaus 19, Carme Oriol amiarà a tèrme visites comentades ara exposicion, en tres torns (11:00h, 11:45h e 12:30h).

Fin finau, diuendres 20, coma clausura des jornades d’ua forma plan ludica, poderam gaudir de “Palmira”, un espectacle de teatre musicau a cargue de BubulinaTeatre, damb Elisenda Rué (actritz e cantant), Izan Rubio (guitarra) e Jordi Lara (dramaturg e director).

Era resèrva per auança ei indispensabla entà poder assistir a toti es actes, es quaus an capacitat limitada. Es resèrves se pòden hèr en Musèu dera Val d’Aran: per telefòn (973 64 18 15) e mail (info.museu@aran.org). Es activitats son de franc, mès er accés ad aguestes non includís era entrada en Ecomusèu de Joanchiquet.