• Aguesta sèrie, impulsada peth govèrn deth Conselh Generau d’Aran dera man de Lleida TV, apòste pera ficcion e er umor entà prebotjar era normalizacion lingüistica der aranés e, damb es sòns naui 12 capitols, tractarà es errors e dubtes mès comuns qu’apareishen en emplec abituau dera lengua pròpria d’Aran
• Es dues prumères temporades d’Èm çò qu’èm se pòden veir ara carta e de franc en https://lleidatv.alacarta.cat/emcoquem

Eth Servici d’Intelligéncia Aranesa (SIA) torne, un an mès, coma eth nòste assistent personau d’informacion sus era lengua aranesa, acompanhada pes sòns assistents e toti es personatges que formen part dera sèrie en aranés ‘Èm çò qu’èm’, qu’aguesta setmana a començat dejà eth rodatge dera sua tresau temporada!

“Deth govèrn d’Aran ençà portam uns ans apostant per ua forma mès creativa entà impulsar era promocion e normalizacion dera nòsta lengua pròpria pr’amor que, a despièch des dificultats damb es que mos trapam entà poder desplegar ua politica lingüistica eficaç entà lutar contra era desaparicion der aranés, consideram indispensable contunhar trabalhant e cercant naues formules entà apropar era lengua as naues generacions”, afirme era sindica d’Aran, Maria Vergés.

Ena sua naua temporada, que constarà de 12 naui episòdis, ‘Èm çò qu’Èm’ apòste pera ficcion e er umor entà prebotjar era normalizacion lingüistica der aranés e, a trauès de diuèrsi gags, tractarà es errors e dubtes mès comuns qu’apareishen en emplec abituau dera lengua pròpria d’Aran, damb era finalitat d’apropar era lengua a un public extens en un format pòc explotat enquiara.

Cau rebrembar qu’es dues prumères temporades dera sèrie se pòden veir de franc e ara carta ena web https://lleidatv.alacarta.cat/emcoquem.

Vielha, 12 de junhsèga de 2022