Vielha, 29 de març de 2018.- Eth Conselh Generau d’Aran e era Fondacion Pere Tarrés an constituït era comission de seguiment deth foncionament dera aubèrja “Era Garona” de Salardú, dempús des prumèrs mesi de vigéncia deth contracte d’arrendament signat a finaus de 2017 per ambdues parts entath foncionament d’aguest equipament.

Era Fondacion Pere Tarrés s’encargue dera gestion d’aguesta installacion deth Naut Aran des deth passat 24 de noveme, dempús de que s’amièssen a tèrme es inversions de melhores en sistèma anti-incendis e gessudes d’emergéncia per part deth Conselh Generau d’Aran.

Era comission de seguiment l’intègren dus representants dera Fondacion Pere Tarrés e d’auti dus deth Conselh Generau d’Aran. Pera Fondacion Pere Tarrés es representants son eth director generau, Josep Oriol Pujol i Humet, e Jordi Inglés Pernia, director deth Servici de Colònies de Vacances. Per part deth Conselh Generau d’Aran hèn part dera comission eth sindic d’Aran, Carlos Barrera, e eth vicesindic e conselhèr de Joenessa, Luís Carlos Medina.

Era Fondacion Pere Tarrés ei era entitat non lucrativa d’òci mès gran de Catalonha damb ua trajectòria de 60 ans ath servici dera enfància, era adolescéncia e era joenessa qu’er an 2016 siguec arreconeishuda damb era Crotz de Sant Jordi dera Generalitat de Catalonha. A era experiéncia ena gestion dirècta de 15 aubèrges e cases de colònies distribuïdes per tot eth territòri de Catalonha, e més d’un centenat de gestion indirècta. Justaments entara Aubèrja “Era Garona” de Salardú, era Fondacion Pere Tarrés demore incrementar eth nombre de persones que se lòtgen ena installacion ath long der an entà visitar era Val d’Aran.