Deuant eth lheuament parciau deth secrèt de somari ena investigacion dera mòrt der os Cachou, eth Conselh Generau d’Aran vò méter de manifèst era injusta acusacion de quauqui sectors en relacion ath prètzhèt d’aguesta institucion e manifèste era següent informacion:

1. Eth lheuament parciau deth secrèt de somari met de manifèst es actuacions amiades a tèrme des dera maxima institucion aranesa deuant aguest ahèr, en tot demostrar qu’eth prètzhèt deth Conselh Generau d’Aran en relacion ara investigacion dera mòrt der os Cachou a estat, non sonque impoluta, senon fonamentau e atau se remasse ena madeisha instruccion dera quau se derive.
2. En data 09/04/2020: es agents de Miei Ambient deth Conselh Generau d’Aran, alertadi pera inactivitat que mostraue eth colièr GPS der exemplar, se desplacèren enquiath punt en quau se localizèc eth cadavre de Cachou, en tot alertar ua dotacion des Agents Ruraus dera Generalitat de Catalunya especializada en podons, pr’amor qu’es responsables der airau de miei ambient deth Conselh Generau avertiren qu’er empodoament poirie èster era causa dera mòrt. Aqueth madeish dia se recuperèc eth cadavre de Cachou e eth Conselh Generau d’Aran encarguèc e abonèc ara Universitat Autònoma de Barcelona (UAB) er informe de necròpsia.
3. Eth 10/04/2020: S’amie a tèrme era necròpsia e se comencèren a confirmar es sospites d’empodoament mès, pr’amor deth confinament, es resultats des analisis s’endarrerissen.
4. En data 14/04/2020: Deuant es demanes de diuèrses associacions, s’acòrde damb eth grop investigador des Agents Ruraus dera Generalitat e damb eth jutjat que sonque se publicarie informacion non relacionada damb eth possible empodoament, entà non dificultar era investigacion en cors.
5. Eth 16/04/2020: Diuèrsi grops ecologistes acusen ath Conselh Generau d’Aran d’amagar informacion e non voler reconéisher qu’eth podon ei ua possible causa dera mòrt de Cachou. Entà desmentir aguestes acusacions, se publique un comunicat en tot aclarir qu’eth govèrn aranés non a valorat era causa dera mòrt e que non ac harà enquia recéber er informe dera necròpsia.
6. Eth 09/05/2020: Er informe dera necròpsia determine que i a auut empodoament e ei eth Conselh Generau d’Aran qui met en mans deth jutjat eth cas, a on se decrète eth secrèt de somari peth quau eth Conselh Generau d’Aran non pòt divulgar quin auie estat eth motiu reau dera mòrt der os.

Pendent eth mes de mai, era jutgessa derive eth cas as Mossos d’Esquadra, a qui es Agents de Miei Ambient deth Conselh Generau d’Aran e es Agents Ruraus dera Generalitat transmeten totes es donades remassades enquiath moment. D’alavetz ençà, diuèrsi foncionaris deth Conselh Generau d’Aran an declarat en tot aportar es informacions requerides.

En tot moment, eth Conselh Generau d’Aran a participat e aufrit era sua ajuda e collaboracion entà descorbir quina auie estat era causa dera mòrt d’aguest exemplar e non a hèt publica cap informacion que podèsse afectar ara investigacion, respectant eth procés judiciau e era pressumpcion d’innocéncia. Atau madeish, arregraís era dilligéncia e professionalitat des responsables der airau de miei ambient dera maxima institución aranesa entà aclarir aguest cas.

Eth Conselh Generau d’Aran comunique qu’amiarà a tèrme ua auditoria de procediment intèrn entà escartar possibles actuacions e actituds que non complisquen damb era professionalitat e rigor que se demore d’un trabalhador public. Atau madeish, eth Conselh Generau d’Aran informe que va a presentar-se ara causa coma acusacion particular, e rèste ara demora qu’eth procés judiciau aclarisque era vertat des hèts.