Deuant era pandèmia causada peth Coronavirus COVID-19, eth Govèrn der Estat a decretat er estat d’alarma en tot eth país.

Pr’amor d’açò, eth govèrn deth Conselh Generau d’Aran demane que toti es ciutadans e ciutadanes dera Val d’Aran complisquen, des d’aué madeish, damb es naues mesures decretades peth Govèrn espanhòl:

1.    Se limite era circulacion pes vies d’us public entara realizacion des següentes activitats:

• Aquesiment d’aliments, productes farmaceutics e de prumèra necessitat.
• Assisténcia a centres sanitaris.
• Desplaçament ath lòc de trabalh.
• Retorn ath lòc de residéncia abituau.
• Assisténcia e suenh de persones granes, menors, depenents, damb discapacitat o especiaument vulnerables.
• Desplaçament a entitats financères.
• Per causa de fòrça major o situacion de besonh.
• Quinsevolh auta activitat degudament justificada.

2.    Eth Ministèri d’Interior pòt acordar eth barrament de carretères o trams d’eres per motius de salut publica, seguretat o floidesa deth trafic.

3.   S’amplie eth barrament de toti es establiments que non siguen de prumèra necessitat a tot er ambit nacionau.

4.   I aurà restriccion as lòcs de culte, tanben en çò que hè as enterraments e nòces.

5.    Se refòrce eth sistèma de salut e toti es trabalhadors queden jos es ordes deth Ministèri de Sanitat.

6.    S’establissen mesures entà assegurar era proteccion de bens e servicis e se impartiràn ordes entath provediment des mercats.

7.    En çò que hè ath transpòrt public, se redusirà era aufèrta totau d’operacions entre un 40% e un 60%. En cas des autobusi, se redusissen a un 50%.

8.    Per çò que hè ath transit adoanèr, es autoritats competentes adoptaràn es mesures de besonh entà garantir-ne eth sòn pas. S’atierà de forma prioritària es productes de prumèra necessitat.

Eth govèrn aranés demane ath conjunt deth territòri era sua collaboracion entà adoptar aguestes mesures de prevencion e contencion mercades peth Govèrn der Estat e era Generalitat de Catalunya, e rebrembe qu’ei de besonh limitar ath maxim eth contacte dirècte damb d’autes persones en tot sajar d’evitar possibles contagis.

Eth govèrn deth Conselh Generau d’Aran contunharà informant sus era evolucion d’aguestes mesures e de quinsevolh nauetat que se pogue produsir.