• Eth Conselh Generau d’Aran a revirat ar aranés dus condes destinadi a mainatges e mainades d’educacion infantila e primaria entà trabalhar, en casa e ena escòla, era diversitat e era definicion dera identitat pròpria

Der airau d’Igualtat deth Conselh Generau d’Aran ençà, s’an editat dus condes en aranés entà trabalhar e explicar era diversitat d’identitats ara mainadèra dera Val d’Aran.

D’aguesti dus libres, eth prumèr, jos eth titol “Èster erós”, redactat per Fátima Fernandéz e Ismael Canales, ensenhe as mainatges e mainades era importànica de compartir, de méter-se en lòc des auti e de reconéisher es sues emocions tà saber-les gerir. Autan coma, explique coma apréner a èster arregraïdi de çò qu’an, coma airina tà èster erosi. Eth dusau conde, titolat “Coa de serena”, escrit per Alba Barbé e Sara Carro, e illustrat per Joan Turu, narre era relacion d’un enfant damb era sua pròpria identitat de genre a trauès d’ua hèsta de titassi que convide a reflexionar, atau coma, as persones que liegen eth conde.

Pendent aguesti dies, era sindica d’Aran, Maria Vergés, a visitat es escòles araneses entà entregar aguesti condes ar escolanat d’educacion infantila e primària dera Val d’Aran. En aguestes visites, era sindica a profitat entà parlar damb eth professorat aranés e conéisher es accions qu’amien a tèrme enes centres de prumèra man. Atau madeish, era sindica tanben s’a interessat en conéisher coma gestionen aguestes setmanes era situacion que provòque era COVID-19 enes centres educatius e, atau coma ven hènt pendent tot aguest temps, a aufrit era collaboracion deth Conselh Generau d’Aran entà tot aquerò que sigue enes sues mans.

“Damb aguesti libres pretenem apropar un shinhau eth concèpte de diversitat as mès petiti, d’ua forma agradiua ath temps qu’ac hèm tanben ena nòsta lengua pròpria” a declarat era sindica e higie que “eth trabalh ena escòla ei fòrça important entà, ath delà d’enes familhes, educar enes valors dera tolerància e empatia ara nòsta joenessa”.

Tanben, entre aué e deman, es professionaus er airau d’Igualtat, s’aproparàn a totes es escòles mairaus dera Val d’Aran entà portar-les exemplars des dus libres.