Coneish es passi de Verdaguer per Aran ena “Setmana Maleïda” deth 5 ath 9 d’agost

En ostiu de 1882, Jacint Verdaguer gessec dera Seu d’Urgell e recorrec eth Pirenèu a pè en cerca dera Maleïda, qu’ère coma tradicionaument se coneishie ath tuc der Aneto
Era setmana culminarà diuendres, 9 d’agost, damb era estrea deth film Maleïda 1882, deth director Albert Naudín. Era pellicula compdèc damb era collaboracion deth Musèu dera Val d’Aran

Eth Musèu dera Val d’Aran a premanit ua semana tematica entà dar a conéisher era cara mès aventuraira de Mossen Jacint Verdaguer, en tot coincidir damb era commemoracion deth centenari dera mòrt de Mossen Condò (5 d’agost de 1919), un aute illustre poèta e gran admirador de Verdaguer.

En ostiu de 1882, Jacint Verdaguer gessec dera Seu d’Urgell e recorrec eth Pirenèu a pè en cerca dera Maleïda, qu’ère coma tradicionaument se coneishie ath tuc der Aneto.

Aguest viatge siguec era hònt d’inspiracion entà poder escríuer ua des sues òbres mèstres: Canigó. Ath delà, li permetec passar pera Val d’Aran, e conéisher es sòns paisatges, camins, costums e gent, entre eri, un aranés que li servic de guida entà poder coronar er Aneto. Eri dus sigueren es prumèrs catalans en arribar enquiath cim.

Aguesta e mès istòries son es que mos compdarà Bernat Gasull i Roig pendent era “Setmana Maleïda”.

Bernat Gasull i Roig (Barcelona, 1971) ei un gran divulgador sus era relacion de Jacint Verdaguer damb era nauta montanha. Escrivan d’articles e libres, entre es quaus destaquen Les ascensions de Verdaguer al Pirineu (Cossetània, 2008) e Maleïda. L’aventura de Jacint Verdaguer a l’Aneto (Verdaguer Edicions, 2015), eth quau l’hec meritador deth prèmi Jacint Verdaguer.

Era setmana tematica comence aué, deluns 5 d’agost, entàs 19 ores, damb ua conferéncia dera man de Gasull, qui mos meterà en contèxte sus era gèsta deth poèta.

De dimars a dijaus, auram era oportunitat de poder sénter e explorar en prumèra persona es impressions de Verdaguer, en tot recórrer parts deth sòn itinerari en Aran. Entàs gessudes ei de besonh inscriuer-se per auança en Musèu dera Val d’Aran.

Fin finau, era setmana culminarà diuendres, 9 d’agost, damb era estrea deth film Maleïda 1882, dirigida per Albert Naudín e que compde damb era interpretacion der actor Lluís Soler.

Eth rodatge compdèc damb era collaboracion deth Musèu dera Val d’Aran, entara eleccion de localizacions (Ecomusèu Çò de Joanchiquet de Vilamòs), prèst de vestiari, contacte damb extres, èca.

Era pellicula se projectarà en exterior dera glèisa de Sant Joan d’Arties entàs 22 ores e serà comentada peth sòn director e Bernat Gasull, coma autor deth libre deth quau partís era idia deth film.