- Era Oficina de Joenessa propòse disparières activitats tàs joenes e joeni, a compdar des dotze ans, en endrets, equipaments e municipis, per tot eth territòri damb er objectiu de promòir ua aufèrta de léser entara sason d’ostiu.
Eth Conselh Generau d’Aran d’Aran, a trauès dera sua Oficina de Joenessa, presente eth prumèr programa “Connexion Joena”, que se harà deth 9 de junhsèga ath 28 d’agost. Ua prepausa ludica en temps de léser entà joenes e joeni a compdar des dotze ans e que se botjarà ath long deth territòri en tot profitar es sòns equipaments, espacis naturaus e municipis.
Er objectiu deth programa, segontes era conselhèra de Joenessa, Maria Menis: “ei promòir ua aufèrta entath aguesta sason tàs joeni dera Val d’Aran, tà fomentar era sua participacion activa e eth sòn ligam damb es politiques de joenessa deth territòri”.
Eth programa ei desvolopat pera Oficina de Joenessa, en collaboracion damb d’auti servicis qué, en territòri, ja trebalhen damb joenes e joeni, coma son “Suenha-te” e “Audèth de Huec” damb era fin d’ampliar aguesta aufèrta d’activitats d’ostiu e bastir prepauses amassa, d’acòrd damb es sòns interèssi, entà generar un espaci a on poder remassar era sua experiéncia tà projèctes futurs en Aran.
Eth programa a estat planificat damb eth supòrt des diferenti municipis participants a trauès des Plans Locaus de Joenessa.
Es activitats programades son de tipologies diferentes segontes es edats:
Ostiu actiu, entà joeni de 12 a 18 ans damb activitats diuèrses e damb ua prepausa centrau tath 18 de junhsèga, ua acampada en refugi dera Bassa d’Oles.
Activitats dinamizades enes carrèrs de Vielha, Les, Salardú e Bossòst e trobades participatives entàs joeni de 12 a 35 ans tà generar espacis entà manifestar interèssi e inquietuds e prepausar era cocreacion de dinamiques collectives que servisquen entà consolidar un espaci de referéncia tàs joeni.
Vrespada joena enquiàs 35 ans ath torn dera musica.
Es activitats dirigides, son damb inscripcion per auança damb eth còdi QR, entà mès informacion a trauès dera Oficina de Joenessa, joenessa@aran.org.
Vielha, 4 de junhsèga 2024