Vielha, 21 de deseme de 2018.- Eth Conselh Generau d’Aran e era Generalitat de Catalonha a trauès deth departament d’Ensenyament, an renauit eth convèni de collaboracion entara realizacion de programes de formacion e insercion organizada peth Conselh Generau d’Aran laguens deth Programa deth Plan de Transicion ath Trabalh (PTT), adreçat a joens qu’an finalizat er ensenhament obligatòri (ESO) sense obtier eth títol de graduat/da.

Eth Programa de formacion e insercion deth PTT Val de Aran, s’adrece a joeni entre 16 e 21 ans que non an eth títol deth graduat escolar mès qu’an desirs de formar-se en bèra profession, entrar en mon laborau o aumentar es possibilitats de contunhar era formación professionau damb un grad mejan.

Eth perfil deth PFI-Plan de Transicion ath Trabalh dera Val d’Aran ei d’Auxiliar en ventes, Burèu e atencion ath public, en qué s’aufrís formacion professionau en encastre deth comèrç, atencion ath client, empaquetat, magasèm, ofimatica e tecniques administratiues basiques, entre d’auti, pr’amor qu’es joens poguen aplicà’c e contunhar en tot apréner a trauès des practiques ena enterpresa.

Era durada ei era d’un cors escolar (1.000h).

Ath delà d’aguesta formacion especifica, es gojats e gojates an era oportunitat de meter-se ath dia damb contenguts basics coma es matematiques, es lengües e era coneishença der entorn, que les permeteràn obtier facilitats entà aprovar era pròva d’accès a Cicles Formatius de Grad Mejan, en cas de voler contunhar era formacion professionau.

Actuauments son 9 es alumnes que corsen eth PFI d’Auxiliar en ventes, Burèu e atencion ath public ena Val de Aran e toti an aprovat eth prumèr trimèstre deth cors damb bones nòtes.

Per d’auta part, eth Conselh Generau d’Aran, a trauès dera enterpresa ALSA, a abilitat un autobús deth servici de transpòrt regular intèrn dera Val de Aran as 07.00h deth maitin entà que es alumnes deth PFI-Plan de Transicion ath Trabalh agen assegurat eth transpòrt entà assistir as classes ena bastissa dera Escòla d’Ostalaria de Les.