• S’an deishat anar un totau de 38 peishi de mès d’un an d’edat en arriu d’Aiguamòg

• Aguestes accions de repoblament son plan importantes entara conservacion dera espècia

En tot contunhar damb es liberaments de cabilat ena Val d’Aran, eth passat 21 d’agost se liberèren en arriu d’Aiguamòg un totau de 38 exemplars de mès d’un an d’edat.

Aguesta ei era dusau accion de liberament d’enguan dempús dera qu’auec lòc eth passat mes de mai, a on se deishèren anar mès de 100 exemplars.

Eth cabilat o “cullereta” (Cottus hispaniolensis) ei un peish petit qu’aucupe arrius e torrents de nauta montanha, a on conviu damb era trueita comuna (Salmo trutta).

Ei ua espècia endemica dera vessant nòrd des Pirenèus e, mès en concrèt, dera conca dera Garona, includint era Val d’Aran, a on actuauments se trape extrèmaments menaçada a causa deth baish numerò d’individus e ar isolament respècte ara rèsta de poblacions dera conca.

Sonque ei present en uns pòqui trams, damb densitats fòrça baishes. Aguestes accions de repoblament son plan importantes entà augmentar eth numerò d’exemplars e conservar, atau, era espècia.