Eth passat dia 21 se signèc eth convèni de collaboracion entre eth Conselh Generau d’Aran e era Associacion entara defensa e estudi dera fauna e flòra autoctòna (ADEFFA), entà emmarcar e potenciar es iniciatives que s’amien a tèrme en relacion ara cria ex-situ deth cabilat (Cottus hipaniolensis). Eth cabilat ei un peish bentonic endemic dera conca dera Garona qu’ei en grèu perilh d’extincion, e per aguest motiu se realizen experiéncies entà sajar-ne era reproduccion en condicions controtlades, tamb er objectiu de realizar campanhes de repoblacion. Era situacion deth cabilat s’agreugèc arran des aiguats de junh de 2013, e per açò tant eth Conselh coma ADEFFA an realizat esfòrci entà sajar d’aplicar mesures que poguen ajudar a recuperar era espècia. En acte, qu’a compdat tamb era preséncia deth sindic d’Aran, Carlos Barrera, e des conselhèrs de Miei Naturau e Territòri, José Enrique Arró  e Tonho Boya, s’a presentat un video divulgatiu sus era conservacion deth cabilat (realizat per EDN e ADEFFA). Aguest serà distribuït pes escòles araneses e d’auti lòcs publics tamb era fin de conscienciar dera raresa e fragilitat en qué se trape era espècia, tau e coma s’a hèt aué madeish ena escòla d’Es Bòrdes, en tot profitar que ja auien participat enes aliberaments de juvenils de cabilat. Entad aguesta activitat s’a compdat tanben tamb era collaboracion dera empresa de divulgacion ambientau Verd e Blu. En çò que tanh ath supòrt economic, aguesti darrèrs trebalhs an estat finançats pera Fundación Biodiversidad e era Fundació Zoo de Barcelona. D’autes iniciatives entara conservacion deth cabilat amiades a tèrme enes darrèrs ans, coma petites translocacions o estudis der estatus actualizat, auien estat emparades pera madeisha Fundación Biodiversidad, atau coma Endesa e eth programa Life Limnopirineus.