Aguest projècte de digitalizacion, iniciat dejà hè diuèrsi exercicis, a implicat que totes es escòles dera Val d’Aran agen podut installar disparièrs equipaments informatics e recorsi educatius digitaus en tot adequar es sues installacions as naui requeriments.
Eth sindic d’Aran, Carlos Barrera, era directora dera Escòla Garona de Vielha, Maite Bayo, era directora dera Escòla Sant Ròc de Bossòst, Paquita Cuny, era directora dera Escòla Ruda de Salardú, Blanca Barra, era directora dera Escòla Loseron d’Arties, Esther Borrell, e era directora dera Escòla Estudi Alejandro Casona de Les, Isabel Caubet, an signat un convèni de collaboracion damb es escòles d’educacion infantila e primària entath finançament des ordenadors des escolans de 5au e 6au de cada centre. Tanben s’i tien en compde aqueri mainatges dera ESO que s’incorpòren damb retard ar ensenhament aranés e que non an dotacion especifica d’ordenador.
Eth Conselh Generau d’Aran a apostat per un projècte de digitalizacion des aules basat en Projècte 1×1 iniciat peth Departament d’Ensenyament dera Generalitat de Catalunya, qu’en Aran se concretèc de forma pionèra en Catalunya enes corsi de 5au e 6au d’Educacion Primària.
Aguest projècte de digitalizacion, iniciat dejà hè diuèrsi exercicis, a implicat que totes es escòles dera Val d’Aran agen podut installar disparièrs equipaments informatics e recorsi educatius digitaus en tot adequar es sues installacions as naui requeriments.
Es centres educatius d’Educacion Primària dera Val d’Aran participen en aguest procès en tot ellaborar tota sòrta de materiaus educatius digitaus atau coma en tot participar en procèssi de formacion en naues tecnologies en mon educatiu.
Es caracteristiques tecniques minimes des ordinadors a aquerir pera Escòla e AMPA, se determinarà per cada centre escolar en foncion des requisits tecnics de besonh entath desvolopament des classes.
Eth Conselh Generau d’Aran finançarà cinquanta euros (50,00 €) per escolan e document de pagament, enquia un maximom de tres mil quate cents cinquanta euros (3.450,00 €), a cargue dera aplicacion pressupostària 01.326.749.00 deth pressupòst generau vigent entar exercici 2018.
Aguest Convèni aurà vigéncia pendent eth cors escolar 2018-2019.
“Eth Conselh Generau d’Aran avalòre fòrça positivament aguest projècte, e pr’amor d’aquerò a era volentat d’implicar-se-i economicament, en tot ajudar as familhes a afrontar era despena dera crompa d’un ordenador ja qu’ei conscient der esfòrç que les supòse híger aguesta despena ara crompa de libres de tèxte” a soslinhat eth sindic d’Aran, Carlos Barrera.
Vielha, 9 d’abriu de 2019
Conselh Generau d’Aran: Núria Sanjuan